महापालिकेच्या मराठी शाळा होणार ‘स्मार्ट’! प्रत्येक शाळेसाठी एलईडी दूरचित्रवाणी संच आणि २७३ दूरचित्रवाणी संच

किती शाळांमध्ये उपक्रम?

संपर्क फाउंडेशनचा हा उपक्रम देशातील ८ राज्यांमध्ये राबविण्यात येत आहे. एक कोटी ८० लाख विद्यार्थ्यांपर्यंत हा उपक्रम पोहोचला आहे. महाराष्ट्रात १३ हजार शाळांमध्ये हा उपक्रम सुरू झाला आहे. मुंबई महानगरपालिकेच्या परळ, दादर, भायखळा, घाटकोपर, चेंबूर, भांडूप, कुर्ला, सांताक्रूझ, गोरेगाव आणि बोरिवली येथील एकूण १३५ शाळांमध्ये हा उपक्रम सुरू करण्यात आला आहे. शिक्षकांच्या क्षमतांचा विकास करणे, अध्यापन पद्धती सोपी करणे हे प्रमुख उद्दिष्ट आहे. प्रत्येक शाळेसाठी एलईडी दूरचित्रवाणी संच, २७३ दूरचित्रवाणी संच, शिक्षकांसाठी स्मार्ट शाळा ॲप्लिकेशन, पाठ योजना, पाठ्यपुस्तकातील धड्यांवर आधारित २७०० चित्रफिती, मूल्यमापनासाठी वस्तुनिष्ठ प्रकारातील ३० हजार प्रश्न आदी उपलब्ध करण्यात आले आहे. महानगरपालिकेच्या २०० शिक्षकांना यासंदर्भातील प्रशिक्षण देण्यात आले आहे.

महानगरपालिका मुख्यालयात मंगळवारी हा उपक्रम सुरू करण्यात आला. त्यावेळी अतिरिक्त महानगरपालिका आयुक्त डॉ. अमित सैनी, उपायुक्त प्राची जांभेकर, संपर्क फाउंडेशनचे संस्थापक अध्यक्ष विनीत नायर, संपर्क फाउंडेशनचे अध्यक्ष डॉ. के. राजेश्वर राव आदी उपस्थित होते. संपर्क स्मार्ट शाळा उपक्रमाच्या माहितीपत्रकाचे, संपर्क दूरचित्रवाणी संचाचे यावेळी अनावरण करण्यात आले.

असा आहे उपक्रम

शिक्षणाची पुढची पायरी ठरणाऱ्या ‘संपर्क स्मार्ट शाळा’ उपक्रमात महानगरपालिका सहभागी झाली आहे. शिक्षण क्षेत्रातील हा आमूलाग्र बदल आहे. या कार्यक्रमाच्या माध्यमातून आम्ही अनेक शाळांपर्यंत पायाभूत साक्षरता आणि संख्याज्ञान (एफएलएन) उपकरणे पोहोचविणार आहोत. ही उपकरणे वापरण्यास सुलभ असल्यामुळे शिक्षकांना त्याचा वापर करता येणार आहे. विद्यार्थ्यांना याचा थेट फायदा होणार आहे. या उपक्रमाद्वारे विद्यार्थ्यांना डिजिटल साक्षर करण्यास मदत होणार आहे. महानगरपालिका हा उपक्रम पुढे नेण्यास सक्षम आहे, असे महानगरपालिका आयुक्त व प्रशासक भूषण गगराणी यांनी सांगितले.