मुख्यमंत्री एकनाथ शिंदे यांनी जी २० परिषदेच्यावेळी इंग्लंडचे पंतप्रधान ऋषी सुनक यांच्याबरोबर झालेल्या भेटीचा उल्लेख करत शिवसेनेच्या ठाकरे गटाचे प्रमुख उद्धव ठाकरे यांच्या संपत्तीबाबत गौप्यस्फोट केला. यावर आता ठाकरे गटाचे खासदार संजय राऊत यांनी प्रत्युत्तर दिलं. तसेच एका बिल्डरचं नाव घेत एकनाथ शिंदेंनाच उलट प्रश्न विचारला. संजय राऊत म्हणाले, "मला याविषयी माहिती नाही, पण उद्धव ठाकरेंच्या लंडनमधील कथित घराच्या चाव्या अजय अश्रफ नावाच्या बिल्डरकडे असतील. अशाप्रकारे बोलल्याने त्यांच्यावरील ५० खोक्यांचे आरोप धुतले जाणार नाही हे त्यांनी लक्षात घ्यावं." "कुणाची कमाई कोणत्या देशात जाते हे सर्वांना माहिती" "मुंबईसह ठाण्यात सध्या बिल्डरांचं राज्य सुरू आहे. हे सगळ्यांना माहिती आहे. यातून केलेली कमाई कोणत्या देशात जाते आणि कोणत्या बिल्डरच्या माध्यमातून जाते हेही सर्वांना माहिती आहे. आम्हाला बदनाम करून एकनाथ शिंदेंवरील डाग धुतले जाणार नाहीत," असं संजय राऊत यांनी म्हटलं. "लोक २०२४ निवडणुकीत यांच्या तोंडावर चिखल लावणार" संसद कर्मचाऱ्यांच्या नवीन गणवेशावर सत्ताधारी पक्ष भाजपाचे निवडणूक चिन्ह ‘कमळ’ मुद्रित केले जात असल्याच्या वृत्तावरून संजय राऊत म्हणाले, "मोदी सरकारला संसदेतील कर्मचाऱ्यांच्या गणवेशावर कमळाचं फूल लावू द्या. मात्र, जनता २०२४ च्या निवडणुकीत पूर्ण चिखल लावणार आहे. हे बनावट कमळ लावून काहीही होणार नाही. लोक यांच्या तोंडावर चिखल लावणार आहेत." हेही वाचा : ऋषी सुनक यांचं नाव घेत एकनाथ शिंदेंचा उद्धव ठाकरेंच्या संपत्तीबाबत गौप्यस्फोट, म्हणाले, "ते लंडनला…" "सरकारला मनोज जरांगे पाटील यांना संपवायचं आहे" मराठा आरक्षणासाठी आंदोलन करणाऱ्या मनोज जरांगे यांच्या उपोषणावर बोलताना संजय राऊत यांनी गंभीर आरोप केले. "या सरकारला मराठा आरक्षणावर काहीच करायचं नाही. हे सरकार घाबरट आहे. हे सरकार केवळ आश्वासन देतं. या सरकारला मनोज जरांगे पाटील यांना मारायचं आहे, संपवायचं आहे. त्यांना काहीही काळजी नाही," असं म्हणत संजय राऊतांनी शिंदे-फडणवीस-पवार सरकारवर टीका केली.
