वैद्यकीय, दंत अभ्यासक्रमासाठी १० हजार विद्यार्थ्यांना प्रवेशाची संधी

राष्ट्रीय आयुर्विज्ञान आयोगाच्या वैद्यकीय समुपदेशन समितीने केंद्रीय कोट्यातील प्रवेश प्रक्रियेची निवड यादी जाहीर केल्यानंतर आता राज्य सामाईक प्रवेश परीक्षा कक्षानेही राज्य कोट्यातील वैद्यकीय व दंत अभ्यासक्रमाची पहिली निवड यादी जाहीर केली. या यादीमध्ये राज्य कोट्यातंर्गत असलेल्या वैद्यकीय अभ्यासक्रमाच्या ८ हजार १३८ जागांपैकी ८ हजार १०६ जागांवर, तसेच दंत अभ्यासक्रमाच्या राज्य कोट्याअंतर्गत २ हजार ७१८ जागांपैकी २ हजार ७०९ विद्यार्थ्यांना प्रवेशाची संधी उपलब्ध करून देण्यात आली आहे. या विद्यार्थ्यांना २२ ऑगस्टपर्यंत सायंकाळी ५.३० पर्यंत प्रत्यक्ष महाविद्यालयात जाऊन प्रवेश घ्यायचा आहे. या कालावधीत १५ ऑगस्ट रोजी स्वांतत्रदिन व १६ ऑगस्ट रोजी गोकुळाष्टमीच्या दिवशी प्रवेश बंद असणार असल्याचे सीईटी कक्षाकडून जाहीर करण्यात आले आहे.

पहिल्या फेरीमध्ये ६० टक्क्यांपर्यंत प्रवेश होण्याची शक्यता

वैद्यकीय व दंत अभ्यासक्रमाच्या पहिल्या यादीमध्ये निवड झालेल्या विद्यार्थ्यांपैकी काही विद्यार्थ्यांनी केंद्रीय कोट्यांतर्गत प्रवेशासाठी अर्ज केले आहेत. या विद्यार्थ्यांना त्या कोट्यातून चांगले महाविद्यालय उपलब्ध झाल्यास ते त्या कोट्यातून प्रवेश घेतात. तसेच पहिल्या निवड यादीतील अनेक विद्यार्थी ‘अधिक चांगले महाविद्यालय’ हा पर्याय निवडतात. त्यामुळे दरवर्षी पहिल्या यादीमध्ये प्रवेशाची संधी मिळालेल्या विद्यार्थ्यांपैकी साधारणपणे ५० ते ६० टक्केच विद्यार्थी पहिल्या फेरीमध्ये प्रवेश घेतात. त्यामुळे या फेरीमध्ये शिल्लक राहिलेल्या जागा दुसऱ्या फेरीसाठी उपलब्ध केल्या जातात.

१ सप्टेंबरपासून सुरू होणार शैक्षणिक सत्र

वैद्यकीय समुपदेशन समितीने जाहीर केलेल्या संभाव्य वेळापत्रकामध्ये वैद्यकीय व दंत अभ्यासक्रमासाठी प्रवेश घेतलेल्या विद्यार्थ्यांचे शैक्षणिक सत्र १ सप्टेंबर २०२५ पासून सुरू करण्याच्या सूचना दिल्या आहेत. मात्र या अभ्यासक्रमाच्या पहिल्या फेरीच्या प्रक्रियेला मुदतवाढ देण्यात आली असून पहिली फेऱ्यातील प्रवेश २२ ऑगस्ट रोजी संपणार आहे. त्यामुळे १ सप्टेंबरपासून महाविद्यालय सुरू करताना वैद्यकीय महाविद्यालयांना तारेवरची कसरत करावी लागणार आहे.