मुंबई : गणेशोत्सवाला अवघे काही दिवस उरले असून घरगुतीसह सार्वजनिक गणेशोत्सव मंडळांमधील तयारी अंतिम टप्प्यात आहे. या चैतन्यमय वातावरणात सूर, श्रद्धा आणि भावनांचा सुंदर संगम असणारे वैशाली माडे प्रस्तुत, पीसफुल बिट्स प्रॉडक्शन्स निर्मित आणि पराग सावंत दिग्दर्शित ‘शंकराचा बाळ आला’ हे नवंकोर श्रीगणेश गीत प्रेक्षकांच्या भेटीला आले आहे. प्रसिद्ध गायिका वैशाली माडे यांच्या भावपूर्ण आणि सुरेल आवाजातील या गीताला मंदार चोळकर यांनी काव्याची ओजस्वी शब्दरचना दिली आहे, तर वरुण लिखाते यांचे सुंदर संगीत लाभले आहे. तसेच गाण्यातील कलाकारांनीही आपल्या अभिनयाच्या जोरावर सर्वांचे लक्ष वेधून घेतले आहे.
निसर्गरम्य कोकणात उत्साहाने साजरा होणारा गणेशोत्सव ‘शंकराचा बाळ आला’ या गाण्यात उलगडतो. मात्र हे केवळ एक गाणे नसून त्यातून सैनिक असलेल्या एका आईची हृदयस्पर्शी कथा सांगितली जाते. गणेशोत्सवासाठी घरी आलेली ही आई बाप्पाची सेवा करून, नंतर पुन्हा देशसेवेसाठी निघते. भक्ती, कुटुंब आणि देशभक्ती यांचा अनोखा संगम या कथेतून आणि दृश्यातून प्रेक्षकांपर्यंत पोहोचतो.
‘शंकराचा बाळ आला’ गीतामधील अभिनेत्री योगिता चव्हाण हिचे भावपूर्ण हावभाव, अभिनेता अभिजीत केळकरची उत्सवी ऊर्जा आणि आरव आयेरचा निरागस आनंद प्रत्येकाला आपल्या घरच्या गणेशोत्सवाची आठवण करून देणारा आहे. गणेशोत्सव हा फक्त सण नसून भावनांचा, परंपरेचा आणि भक्तीचा अविष्कार आहे. ढोल-ताशांच्या गजरात, फुलांच्या सजावटीत, आरती आणि प्रसादाच्या सुवासात दडलेले वातावरण हे प्रत्येकाच्या मनात आनंद आणि श्रद्धेची लहर निर्माण करते. ‘शंकराचा बाळ आला’ हे गाणे या उत्सवात चैतन्याची, भक्तीभावाची आणि देशभक्तीची एक सुंदर भर घालणार आहे.
दिग्दर्शक पराग सावंत म्हणाले, ‘शंकराचा बाळ आला’ हे गाणे बनविताना आम्ही प्रत्येक फ्रेममध्ये तो आत्मा पकडण्याचा प्रयत्न केला. दृश्य, संगीत आणि भावना यांचा संगम प्रेक्षकांच्या मनात घर करून जाईल, अशी आम्हाला खात्री आहे’. तर गायिका वैशाली माडे म्हणतात की, ‘गणेशभक्तीचा स्वर हा माझ्या गायकीचा नेहमीच महत्त्वाचा भाग राहिला आहे. ‘शंकराचा बाळ आला’ हे गीत केवळ मनोरंजनासाठी नाही, तर भक्तीभाव जागवण्यासाठी आहे. यात शब्द, सूर आणि भावनांचा असा संगम आहे की ऐकणाऱ्याला ते थेट गणेशोत्सवाच्या पवित्र वातावरणात आणि भक्तीच्या लहरीत घेऊन जाते. मला विश्वास आहे की हे गाणे गणेशभक्तांच्या हृदयात दीर्घकाळ गुंजत राहील’.
