जगातील सर्वात लठ्ठ महिला मुंबईत; विमानतळावर आणल्यानंतर क्रेनने हलवलं

काही दिवसांपूर्वी एका डॉक्टरने ट्विट करून भारताच्या पररारष्ट्र मंत्री सुषमा स्वराज यांना तिची मदत करण्याची विनंती केली होती. या विनंतीला मान देत स्वराज यांनी  भारतात येण्यासाठी वैद्यकीय व्हिसा देऊ केला होता. इजिप्तमधल्या अलेक्झॅड्रीयामध्ये राहणारी ३६ वर्षीय इमान ही जगातील सगळ्यात लठ्ठ महिला आहे. या महिलेचे वजन तब्बल ५०० किलो म्हणजे अर्धा टन असल्याचे नोंदवण्यात आले आहे. इमान ही गेल्या २५ वर्षांपासून घरातून बाहेरच पडली नाही. ‘डेली मेल’ने दिलेल्या माहितीनुसार या महिलेचे वजन इतके अधिक आहे की तिला बिछान्यावरुन हलताही येत नाही. आपल्या दैनंदिन क्रियेसाठी ती पूर्णपणे आपल्या आई आणि बहिणीवर अवलंबून असते. इमानचे लहानपणापासूनच वजन हे तिच्या वयापेक्षा अधिक होते. जन्माच्यावेळीच तिचे वजन जवळपास ५ किलोच्या आसपास होते. इमान ही ११ वर्षांची झाली तेव्हा तिच्या वजनामुळे तिला नीट उभे राहता यायचे नाही. त्यामुळे खेळण्या बाडगण्याच्या वयात इमानला घरातच राहावे लागायचे. त्यातूनच अर्धांगवायूचा झटका आल्याने तिला शाळाही सोडावी लागली. गेल्या २५ वर्षांपासून तिची आई आणि बहिण तिची सेवा करत आहे. इमान पूर्णपणे त्यांच्यावर अवलंबून आहे.  त्यामुळे तिच्या कुटुंबियांनी इजिप्तचे राष्ट्रपती अब्देल फतेह अल सीसी यांच्याकडे वैद्यकीय साहाय्य मागितले होते.