विद्यापीठ प्रकरणाची चौकशी करणार नागपूर : आदर्श प्राचार्य पुरस्कारासाठीच्या अर्जात वर्धा येथील बजाज विज्ञान महाविद्यालयाचे प्राचार्य डॉ. ओम महोदया यांनी खोटी माहिती दिली. याची माहिती कुलगुरू डॉ. सुभाष चौधरी यांना असूनही त्यांनी कागदपत्रांची पडताळणी न करता ‘उत्कृष्ट प्राचार्य’ पुरस्काराने सन्मानित केल्याची तक्रार वर्धा येथील महादेवराव शेंडे यांनी केली आहे. विद्यापीठ या संपूर्ण प्रकरणाची चौकशी करणार आहे. महादेवराव शेंडे यांच्या आरोपामुळे विद्यापीठातील आदर्श प्राचार्य पुरस्कारांवर प्रश्नचिन्ह उपस्थित करण्यात आला आहे. यासंदर्भात राज्यपाल व मुख्यमंत्र्यांनादेखील तक्रार करण्यात आली आहे. विद्यापीठात २६ जानेवारीला आदर्श पुरस्कारांचे वितरण करण्यात आले. यावेळी आदर्श शिक्षक आणि प्राचार्याना सन्मानित केले गेले. त्यांच्या निवडीवर शेंडे यांनी आक्षेप घेतला आहे. पुरस्कारासाठी दावेदारी करत असताना त्यांनी चुकीची माहिती दिली. विद्यापीठाने त्याची पडताळणी न करताच त्यांची निवड केली, असा आरोप शेंडे यांनी केला आहे. विद्यापीठाचे कुलसचिव डॉ. अनिल हिरेखन यांनी चौकशी केली जाईल, असे सांगितले.
