बुलढाणा: तालुक्यातील पळसखेड व पाडळी या गावा दरम्यान भीषण अपघात झाला. श्रावण सोमवार निमित्त निघालेल्या कावड यात्रेत भरधाव अनियंत्रित दुचाकी ( मोटार सायकल ) शिरल्याने झालेल्या दुर्देवी अपघातात एक भाविक ठार झाला. चार जखमी झाले.
अजिंठा मार्गावरील पाडळी आणि पळसखेडच्या मध्ये सोमवारी, ४ ऑगस्ट रोजी एका भरधाव मोटरसायकलने कावडधाऱ्यांना उडवले. या भीषण अपघातामध्ये एक जण जागीच ठार तर चार जण जखमी झाले आहेत. मृतकाचे नाव मुकेश गजानन राठोड (वय २५) असून तो गुळभेली येथील रहिवासी आहे. कावड यात्रेतील आणखी दोघेजण गंभीर जखमी झालेले आहेत तर मोटरसायकल वरील दोघांनाही जबर मार लागला आहे.
गुळभेली येथे ग्रामसेवक नागपुरे यांच्या पुढाकारातून नव्यानेच शिवमंदिर बांधण्यात आले आहे. रविवारी संध्याकाळी सात वाजेच्या सुमारास गुळभेली येथून पहिल्यांदाच बुलढाणा तालुक्यातील बुधनेश्वरला कावड यात्रा निघाली. जवळपास चाळीस पेक्षा अधिक तरुण या कावडयात्रेत सहभागी झाले होते. बुधनेश्वरला पोहोचल्यानंतर रात्री १२ वाजेच्या सुमारास आरती करण्यात आली. त्यानंतर श्रावण सोमवार सुरू झाल्यामुळे कावड यात्रा परतीसाठी रवाना झाली. दरम्यान पळसखेड नागोच्या जवळपास एक भरधाव मोटरसायकल मागून येऊन कावड यात्रेत घुसली.
मोटर सायकल (एम एच २८ बी. झेड ५२७४) ने कावडधारी मुकेश राठोडला उडवले. योगेश चव्हाण आणि आणखी एक कावडधारी या धडकेत जखमी झाले. मोटरसायकल स्वार ऋषिकेश काकडे आणि मनोज माळोदे हे दोघेही जबर जखमी झाले. सर्वांना तात्काळ जिल्हा सामान्य रुग्णालयात दाखल करण्यात आले. मात्र मुकेश राठोड याचा उपचारापूर्वीच मृत्यू झाला होता. दोन्ही मोटर सायकल स्वार बुलढाणा येथील मुठे लेआउट मध्ये राहतात. विशेष म्हणजे मोटर सायकलवाले सुद्धा कावडधारीच होते. कावड घेऊन थकल्यामुळे ते मोटर सायकलवर बुलढाण्यातील घराकडे जातं होते. अपघातात ठार झालेला मुकेश राठोड दोन मुलांचा पिता आहे. शेगाव येथील संत गजानन महाराजांच्या मंदिरातील तो सेवाधारी होता. त्याच्या मृत्यूने गुळभेलीवासियांवर शोककळा पसरली आहे.
