भाजप आमदारांना शिवीगाळप्रकरणी ठाणेदारावर कारवाई; प्राथमिक चौकशीचे आदेश

अकोला : केंद्रात व राज्यात भाजपची सत्ता असतांना सत्ताधारी पक्षाचे मूर्तिजापूर येथील आमदार हरीश पिंपळे यांना चक्क बार्शीटाकळी पोलीस ठाण्याच्या ठाणेदाराने अश्लील भाषेत शिवीगाळ केल्याचा धक्कादायक प्रकार रविवारी रात्री घडला. या प्रकरणात आमदार हरीश पिंपळे यांनी थेट मुख्यमंत्री तथा गृहमंत्री देवेंद्र फडणवीस यांच्याकडे तक्रार देऊन ठाणेदाराचे निलंबन करण्याची मागणी केली आहे. या प्रकरणी संबंधित ठाणेदाराचा पदभार काढून त्यांची पोलीस नियंत्रण कक्षात बदली केली. सहा. पोलीस अधीक्षक अनमोल मित्तल यांना प्राथमिक चौकशीचे आदेश देण्यात आले आहेत.

बार्शीटाकळी पोलीस ठाण्यांतर्गत गोवंशाची कत्तलीसाठी अवैध वाहतूक एका ट्रकमधून करण्यात येत असल्याच्या संशय भाजप कार्यकर्ते हरीश वाघ यांना आला होता. त्यांनी याची माहिती बार्शीटाकळी पोलीस ठाण्याचे ठाणेदार प्रकाश तुनकलवार यांना दिली. पोलिसांनी ते वाहन सोडून दिले. संबंधित कार्यकर्त्याने याची माहिती आमदार हरीश पिंपळेंना दिली. आमदारांनी ठाणेदारांशी भ्रमणध्वनीवरून संपर्क करून विचारणा केल्यावर ठाणेदारांनी असभ्य भाषेत संवाद साधला. आमदारांकडे तक्रार केल्यामुळे संतापाच्या भरात ठाणेदारांनी भाजपच्या त्या कार्यकर्त्याशी पुन्हा भ्रमणध्वनीवर संपर्क साधत अश्लील भाषेत शिवीगाळ देखील केली. या प्रकाराची ध्वनीफित समाजमाध्यमावर प्रसारीत झाली आहे.

कार्यकर्त्याने हा प्रकार आमदारांच्या कानी घातल्यावर त्यांनी पुन्हा ठाणेदाराशी संपर्क केला, तर त्यांना देखील ठाणेदाराने शिवीगाळ केल्याचा आरोप करण्यात आला आहे. या सर्व प्रकरणाची आमदार हरीश पिंपळे यांनी गंभीर दखल घेतली असून त्यांनी मुख्यमंत्री तथा गृहमंत्री देवेंद्र फडणवीस यांच्यासह विधानसभा अध्यक्षांकडे तक्रार दाखल केली. या प्रकरणी बार्शीटाकळीचे ठाणेदार प्रकाश तुनकलवार यांची तत्काळ पोलीस नियंत्रण कक्षात बदली करण्यात आली आहे. अकोटचे सहाय्यक पोलीस अधीक्षक अनमोल मित्तल यांना प्रकरणाची प्राथमिक चौकशी करण्याचे आदेश देण्यात आले आहेत. बार्शीटाकळी येथील तात्पुरता कार्यभार येथील दुय्यम अधिकारी एपीआय दीपक वारे यांना देण्यात आल्याची माहिती अकोला पोलिसांकडून देण्यात आली.

ठाणेदारावर हक्कभंग दाखल करणार

गोवंशाच्या कत्तलीसाठी अवैध वाहतुकीच्या संशयावरून बार्शीटाकळीच्या ठाणेदारांशी संपर्क साधला, त्यांनी माझ्यासह कार्यकर्त्याला शिवीगाळ केली. या प्रकरणी तत्काळ कारवाईची मागणी गृहमंत्री, विधानसभा अध्यक्ष व अकोला जिल्हा पोलीस अधीक्षकांकडे केली आहे. या प्रकरणी हक्कभंग दाखल करणार आहे, असे आमदार हरीश पिंपळे यांनी सांगितले.