अकोला : अमरावती विभाग पदवीधर मतदारसंघातील निवडणुकीत मतदानाच्या ३६ तासांपूर्वी काँग्रेसचे उमेदवार धीरज लिंगाडे व अपक्ष उमेदवार शरद झांबरे यांच्या संवादाची एक ध्वनीफित समाजमाध्यमातून प्रसारित झाली आहे. यामध्ये काँग्रेसचे उमेदवार धीरज लिंगाडे यांनी ‘काँग्रेस पक्ष बोगस’ असल्याचे म्हटले. त्यामुळे, मतदानाच्या तोंडावर खळबळ उडाली आहे. विधानपरिषद अमरावती पदवीधर मतदारसंघाच्या निवडणुकीसाठी ३० जानेवारीला मतदान होणार आहे. त्याआधीच महाविकास आघाडीच्या उमेदवाराची एक ध्वनीफित अपक्ष उमेदवार शरद झांबरे यांनी समाजमाध्यमातून प्रसारित केली. यामध्ये शरद झांबरे यांनीच धीरज लिंगाडे यांच्याशी संपर्क साधून संवाद साधला आहे. उमेदवारी जाहीर होण्याच्या आधीची ही ध्वनीफित असल्याचे लक्षात येते. या ध्वनीफितीमध्ये शरद झांबरे यांनी आपण कुठे असल्याची विचारणा केली. त्यावर धीरज लिंगाडे यांनी दिल्लीत असल्याचे सांगितले. त्यानंतर दोघांमध्येही उमेदवारीवरून बोलणे झाले. यामध्ये काँग्रेसचे उमेदवार धीरज लिंगाडे म्हणाले, ‘महाविकास आघाडीचे तांगडे असेच असते. बघू या तरी. काँग्रेस पक्ष बोगस आहे.’ त्यावर झांबरे म्हणाले, ‘डॉ. ढोणेंसाठी नानाभाऊंना (नाना पटोले) ‘मॅनेज’ केले रणजीत पाटील यांनी, अशी चर्चा आहे.’ त्यावर ‘हो, तसच आहे ते,’ असे उत्तर लिंगाडे यांनी दिल्याचे ध्वनीफितीत ऐकू येते. हेही वाचा - गळफास कसा घ्यायचा, काढायचा हे पाहत होता १२ वर्षीय मुलगा, अन्…; नागपुरातील थरकाप उडवणारी घटना हेही वाचा - नागपूर : फेब्रुवारीत येणार पुन्हा १२ चित्ते, सामंजस्य करारावर स्वाक्षरी, स्वागताची तयारी सुरू ही ध्वनीफित झांबरे यांनी मतदानाच्या ३६ तास अगोदर समाजमाध्यमातून प्रसारित करीत त्यामध्ये आपला व काँग्रेस उमेदवार लिंगाडेंचा संवाद झाल्याचा दावा केला आहे. ऐन मतदानाच्या तोंडावर झांबरेंनी ही ध्वनीफित प्रसारित करण्याचे कारण काय? यावरूनही आता शंका उपस्थित केली जात आहे. लिंगाडे यांचा भ्रमणध्वनी बंद असल्याने या संदर्भात त्यांच्याशी संपर्क होऊ शकला नाही.
