बुलढाणा: निसर्गाच्या अवकाळी तांडवामुळे जिल्ह्यात एप्रिलमध्ये झालेल्या नुकसानीची आकडेवारी लक्षात घेतली तर हा उन्हाळा की पावसाळा, असा प्रश्न कोणाच्याही मनात उपस्थित होणे स्वाभाविक आहे. यंत्रणांनी केलेल्या सर्वेक्षणणाचा हा अहवाल जिल्हाधिकाऱ्यांसह शासनाकडे सादर करण्यात आला आहे. सात हजार ८२ शेतकऱ्यांच्या ७ हजार ६७९ हेक्टरवरील पिकांची नासाडी झाली आहे. याचे मूल्य ६ कोटी २९ लाख रुपये आहे. वीज पडून ५८ जनावरे दगावली तर २६९ घरांची पडझड झाली आहे. ७ व ८ एप्रिल रोजी १८०शेतकऱ्यांचे एक हजार ४७७ हेक्टर तर ९ ते १६ एप्रिल दरम्यान ६३ शेतकऱ्यांचे दोन हजार १७७ हेक्टर, २० एप्रिल रोजी चिखली येथील ५६ शेतकऱ्यांचे २१.५० हेक्टर क्षेत्राचे नुकसान झाले . २५ ते ३० एप्रिल पर्यंत ४००३ .०५ हेक्टर क्षेत्रावरील पिकांचे नुकसान झाले आहे. अंतिम आठवडा ठरला भीषण शेवटच्या आठवड्यातील २५ ते ३० एप्रिल दरम्यान झालेले नुकसान अभूतपूर्व ठरले. ३६२ गावातील ४००३ हेक्टरचे नुकसान झाले आहे. बुलडाणा तालुक्यात ४९ गावातील १९१.६० हेक्टर चिखली मधील १०८ गावांमधील ८९६.३० हेक्टर मोताळा मधील ६६ गावांतील ५४७.२० हेक्टर, मलकापुर मधील ३ गावांतील २१.८० हेक्टर , खामगावातील ५३ गावांचे १४५४.६० हेक्टरवर, शेगाव तालुक्यातील ३ गावांचे १५, नांदुरा तालुक्यातील ३३ गावांचे २३९, मेहकर १० गावांच्या १०२ हेक्टर, देऊळगाव मधील ३७ गावातील ५३५.६५ हेक्टरवरील पिकांचे नुकसान झाले आहे. खामगाव तालुक्यात सर्वाधिक हानी ७ व ८ एप्रिल रोजी खामगाव तालुक्यात मोठे नुकसान झाले. २३९१ शेतकऱ्यांचे एक हजार ४७७ .६९ हेक्टर क्षेत्रावरील दोन कोटी ४८ लाख ८४ हजार रुपयांचे नुकसान झाले आहे. यामध्ये १८० शेतकऱ्यांच्या जिरायत शेतीचे ११४.०४ हेक्टर, २०१७ शेतकऱ्यांचे १२३०.४५ हेक्टर बागायतीचे, १९४ शेतकऱ्यांचे १३३.२० हेक्टरवरील फळबागांचे नुकसान झाले आहे.
