प्रत्येक जिल्ह्य़ात  मुख्यमंत्री सहायता निधी कक्ष

आर्थिकदृष्टय़ा दुर्बल घटकांना दुर्धर आजारांवर उपचार करण्यासाठी या निधीतून अर्थसहाय्य पुरवले जाते. मागील सरकारने यासाठी उपराजधानीतील मुख्यमंत्री सचिवालयात विशेष कक्ष सुरू केले होते. फडणवीस सरकार जाऊन राष्ट्रपती राजवट लागू झाल्यानंतर हे कक्ष बंद करण्यात आले. या कार्यालयातील अधिकारी मूळ विभागात पाठवण्यात आले. महाविकास आघाडीचे सरकार आल्यानंतर विरोधात बसलेल्या भाजपने लगेच कक्ष सुरू करण्याची मागणी केली. विदर्भातील सत्ताधारी आमदारांनी देखील हीच मागणी केली होती. त्याची दखल घेत मुख्यमंत्री उद्धव ठाकरे यांनी विदर्भातीलच नव्हेतर इतर कुठल्याही भागातील लोकांना मुंबई मंत्रालयात मदतीसाठी यावे लागू नये यासाठी त्यांच्या जिल्ह्य़ाच्या मुख्यालयातच या निधीसाठी प्रस्ताव सादर करता यावा म्हणून प्रत्येक जिल्ह्य़ात मुख्यमंत्री वैद्यकीय सहायता निधी कक्ष उभारण्यास पुढाकार घेतला आहे.

विधानभवन परिसरात भाजपचा मोर्चा

अवकाळी पावसामुळे राज्यातील शेतकऱ्यांचे मोठे नुकसान झाले आहे. त्यांना हेक्टरी २५ हजार रुपये मदत द्या, या मागणीसाठी भाजपने विधानभवन परिसरातील पक्ष कार्यालयातून विधानसभेच्या पायऱ्यांपर्यंत मोर्चा काढत निदर्शने केली. यावेळी शिवसेनेच्या सामना या मुखपत्रातील बातमीचे कात्रण असलेले बॅनर्स झळकवण्यात आले. विधानसभेतील विरोधी पक्षनेते देवेंद्र फडणवीस, विधान परिषदेचे प्रवीण दरेकर, भाजपचे प्रदेशाध्यक्ष चंद्रकांत पाटील यांच्या नेतृत्वात हे आंदोलन झाले. याप्रसंगी आमदारांनी घोषणा दिल्या.

पंतप्रधानांनी सर्वपक्षीय बैठक बोलवावी खासदार संजय राऊत यांची मागणी

नागपूर : सुधारित नागरिकत्व कायद्यावरून देशभरात प्रक्षोभ आहे. या पाश्र्वभूमीवर पंतप्रधान नरेंद्र मोदी यांनी सर्वपक्षीय बैठक बोलवावी, अशी मागणी शिवसेना नेते व खासदार संजय राऊत यांनी केली. मंगळवारी विधान भवन परिसरात आले असता ते पत्रकारांशी बोलत होते.

दिल्लीसह इतर काही ठिकाणी विद्यार्थ्यांवर लाठीमार व काही ठिकाणी गोळीबारही झाला. पंतप्रधान नरेंद्र मोदी यांनी तातडीने सर्वपक्षीय बैठक बोलावून या  संकटावर तोडगा काढण्याची गरज आहे. गृहमंत्री अमित शहा यांनी अयोध्येतील राम मंदिर भव्य दिसेल असे सांगितले. त्याचे श्रेयही ते घेऊ इच्छितात.  प्रत्यक्षात या मंदिराचा पाया मजबूत करण्याचे काम शिवसेनेने केले आहे. या कामात लक्षावधी कार सेवकांनीही श्रम घेतले आहेत.  देवेंद्र फडणवीस नेहमीच मी सामना वाचत नसल्याचे सांगत होते. आजच्या आंदोलनात त्यांनी सामनातील बातमीचे कात्रण झळकवल्याने त्यांना सामना वाचण्यासाठी विरोधी पक्षात यावे लागले, हे स्पष्ट होते अशा शब्दात राऊत यांनी  टोला लगावला.