बुलढाणा : मराठा आरक्षण व लाठीमारप्रकरणी गृहमंत्री फडणवीस यांनी राजीनामा द्यावा या मागण्यासाठी बेमुदत उपोषण करणाऱ्या मोताळा येथील आंदोलकांची प्रकृती आज पाचव्या दिवशी खालावली. यामुळे दोघांना आज दुपारी रुग्णालयात हलविण्यात आले. त्यांच्यावर उपचार सुरू आहे. शुभम घोंगटे व निलेश सोनुने अशी मोताळा ग्रामीण रुग्णालयात दाखल करण्यात आलेल्या उपोषणकर्त्यांची नावे आहे.
सुनील कोल्हे, रावसाहेब देशमुख, अमोल देशमुख, शुभम घोगटे, निलेश सोनुने, ओमप्रकाश बोर्डे यांनी ८ पासून उपोषण सुरु केले होते. आज मंगळवारी सहा पैकी वरील दोघांची प्रकृती बिघडल्याने डॉक्टरांनी त्यांची तपासणी केली. आरोग्य व प्रशासनाच्या वरिष्ठ सूत्रांनी विनवणी केल्यावर दोघेजण उपचारास तयार झाले. त्यांच्यावर तत्काळ उपचार सुरू करून ‘सलाईन’ देण्यात येत आहे . त्यामुळे त्यांचे कुटुंबिय व समाज बांधव आणि मोताळावासी हवालदिल झाल्याचे दिसून आले. दरम्यान हे आंदोलन चिघळल्याने जिल्हा प्रशासन देखील अडचणीत आले आहे.
