Video: येता संकट धैर्य, शौर्यासह लढली माझी आई….! पिल्लाचा जीव वाचवण्यासाठी वाघापुढे उभे ठाकले अस्वल

ताडोबा अंधारी व्याघ्रप्रकल्पात वाघ घास घेऊ पाहणाऱ्या आपल्या लाडक्या पिल्लाला वाचवण्यासाठी मादी अस्वल वाघाशी भिडले. बराचवेळ चाललेल्या लढाईत अखेर मादी अस्वलातील मातृत्त्व जिंकले आणि वाघाला माघार घ्यावी लागली. (Photo, Video Credit – @thinklight_jalpa and @madhurnangia_photograhy) pic.twitter.com/kiLXVfEzDe

— LoksattaLive (@LoksattaLive) September 28, 2024

हेही वाचा : Video: यवतमाळ-दारव्हा मार्गावर व्याघ्र दर्शन, तीन जनावरांचा फडशा

या लढाईत हे मादी अस्वल मागे हटण्यास तयार नव्हते. त्याचवेळी पिल्लू त्या मादी अस्वलाच्या पाठीशी होते आणि जणू आईला लढायचे बळ पुरवत होते. आपली आई आपल्याला वाघापासून वाचवेल हा विश्वास त्या पिल्लाच्या डोळ्यात स्पष्ट दिसून येत होता. सुरुवातीला, वाघाने बळाचा वापर करण्याचा प्रयत्न केला. पूर्ण ताकडीने तो अस्वलाशी भिडला, पण प्रत्येकवेळी अस्वलाने त्याला मागे टाकले. शेवटी वाघाने या लढाईत माघार पत्करली, पण तो पुन्हा येण्याची शक्यता असल्याने अस्वलाने वाघाचा पाठलाग केला. मादी अस्वलाचा तो आवेश पाहून शेवटी वाघाला पळता भूई थोडी झाली. आपल्या बाळाला धोका पोहोचवण्याचा प्रयत्न कुणी करत असेल तर माता किती निर्भय होते, हे या चित्रफितीतून दिसून आले. ताडोबा-अंधारी व्याघ्रप्रकल्पाच्या अलीझंझा, निमढेला परिसरात आपले साम्राज्य उभारणारा ‘छोटा मटका’ म्हणजेच हा वाघ होता. वाघ सहजासहजी आपली शिकार सोडत नाही आणि ‘छोटा मटका’ सारख्या आक्रमक वाघाकडून तर ही अपेक्षाच नाही. मात्र, आपल्या पिल्लाला वाचवण्यासाठी या मादी अस्वलाने ‘छोटा मटका’ला देखील नमवले.