गोंदिया :- गोंदिया शहरा जवळील ग्राम कारंजा येथे जुन्या वैमनस्यातून एका सावकाराची धारदार शस्त्रांनी हत्या करण्यात आल्याची घटना सोमवार १२ मे रोजी सकाळी १०:३० वाजताच्या सुमारास फुलचूर ते कवलेवाडा मार्गावरील भद्रूटोला येथे घडली.
महेंद्र मदारकर (४५) रा. ग्राम कारंजा ता. गोंदिया असे या घटनेतील मृतकाचे नाव आहे. घटना घडल्यानंतर कारंजा गावातील पोलीस पाटील अलका रंगारी यांनी याबाबतची माहिती गोंदिया ग्रामीण पोलीस स्टेशन येथे पोलीस निरीक्षक चंद्रकांत काळे आपल्या पथकासह घटनास्थळी दाखल झाले. दरम्यान मृतक महेंद्र मदारकर याचे मृतदेह गावात एक घराचे बांधकाम होत असलेल्या कॉलमच्या खड्ड्यात पडून होता. गोंदिया ग्रामीण पोलिसांनी मृतदेह गोंदिया जिल्हा सामान्य रुग्णालयात उत्तरी तपासणीकरिता पाठवला.
कारंजा येथील राज गब्बर (३५), अजय कलाने (३३), गुलशन उईके (३०), कृष्ण सत्यवान मेश्राम(२२) सर्व राहणार कारंजा तालुका गोंदिया या ४ संशयित तरुणांना विचारपूस करिता ताब्यात घेण्यात आलेले आहे. गोंदिया ग्रामीण पोलीस निरीक्षक चंद्रकांत काळे यांनी दिलेल्या माहितीनुसार मृतक हा गुंड प्रवृत्तीच्या होता आणि गावात सावकारी करत होता.
मृतकाचा मुलगा पण गावात दारू विक्रीच्या व्यवसायात करत होता. गावात काही दिवसापूर्वी महेंद्र मदारकर चे गावातील काही प्रकरणाला घेऊन कारंजा गावातीलच तरुणांशी वाद झाला होता आणि त्यात महेंद्र मदारकर यांनी त्या तरुणांना पुढे बघून घेण्याची धमकी दिली होती. अशातच आज सोमवारी महेंद्र मदारकर आपल्या घरा शेजारी फिरत असताना गावातील काही तरुणांनी त्याला घेरले दरम्यान आपला जीव वाचवण्याकरिता पळत सुटलेला महेंद्र भद्रुटोला या गावात घराचे बांधकाम सुरू असलेल्या एका कॉलमच्या खड्ड्यात धावतांनी पडला आणि तिथेच त्याच्या त्याचा पाठलाग करत असलेल्या तरुणांनी त्याला त्या कॉलमच्या खड्ड्यात तलवारीने भोसकून त्याची हत्या केली.
