कार्यालय सुरू, कर्मचारी बेपत्ता!

महापालिका झोन कार्यालयातील बेपर्वाई; वेळेतील बदलाचे पालन नाही

उन्हाची तीव्रता वाढल्याने लोकांच्या सोयीसाठी सर्व झोन कार्यालयांच्या वेळेत प्रशासनाने बदल केला खरा, पण कर्मचाऱ्यांनी मात्र तो स्वीकारला नाही, त्यामुळे सकाळी ८ वाजता सुरू झालेल्या कार्यालयात मोजकेच कर्मचारी उपस्थित राहत असल्याची बाब मंगळवारी पाहणी दौऱ्यात उघड झाली.

महापालिका प्रशासनाने २९ मेपासून कार्यालयाची वेळ सकाळी १० ऐवजी सकाळी ८ वाजतापासून करण्याचा निर्णय घेतला. या वेळेत कर्मचारी येतात का म्हणून प्रभारी महापौर दीपराज पार्डीकर आणि परिवहन समितीचे सभापती बंटी कुकडे यांनी झोन कार्यालयांचा दौरा केला. या दरम्यान त्यांना धक्कादायक चित्र दिसून आले. नेहरूनगर आणि लकडगंज झोनमध्ये मात्र बोटावर मोजण्याइतके कर्मचारी कार्यालयात उपस्थित होते. नेहरूनगर झोनमध्ये केवळ १० तर लकडगंज झोनमध्ये १७ कर्मचारी उपस्थित होते. कार्यालयात उशिरा येणाऱ्या कर्मचाऱ्यांवर कारवाई करण्याचे निर्देश यावेळी देण्यात आले.

सकाळी ८ वाजता नेहरूनगर झोनमध्ये एक महिला सफाई कर्मचारी काम करीत होती. पहिल्या मजल्यावर आरोग्य, सार्वजानिक बांधकाम, कर, विद्युत आणि अधिकाऱ्यांच्या कक्षात कोणीच नव्हते. आरोग्य विभागात २ कर्मचारी दिसून आले. सहायक आयुक्त आणि अधिकारीही कार्यालयात आले नव्हते. कर विभागातील कर्मचारी वेळेच्या पाच मिनिटे आधी उपस्थित असणे आवश्यक असताना ८.३० वाजता ते कार्यालयात आले. अन्य विभागाची स्थिती अशीच होती.

ओसीडब्ल्यू विभागात केवळ दोन कर्मचारी उपस्थित होते. पाण्याची देयक भरण्यासाठी लोक आले होते. मात्र कर्मचारी उपस्थित नव्हते. दोन्ही पदाधिकारी कार्यालयात पोहचले तेव्हा उपस्थित कर्मचाऱ्यांची भंबेरी उडाली. कर्मचारी आपल्या सहकाऱ्यांना फोन करून कार्यालयात लवकर पोहचण्यासंबंधी सांगत होते. यावेळी पार्डीकर यांनी सर्व उशिरा आलेल्या कर्मचाऱ्यांना समज देत उद्यापासून जर वेळेवर हजर उपस्थित राहिले नाही तर सक्त कारवाई करण्याचे निर्देश यावेळी दिले. लकडगंज झोनमध्ये आरोग्य विभागात १० पैकी केवळ १ कर्मचारी उपस्थित होता. कर विभागात ५ कर्मचारी, तर अन्य विभागात बोटावर मोजण्याइतके कर्मचारी हजर होते. पार्डीकर यांनी विविध विभागात किती कर्मचारी आहेत, याची माहिती घेतली. अध्र्यापेक्षा जास्त कर्मचारी ८.३० वाजता कार्यालयात पोहोचले नव्हते. कर विभागात ५ कर्मचारी होते मात्र त्यांनी कामाला सुरुवात केली नव्हती.

पाण्याचा अपव्यय

शहरात एकीकडे पाण्याची टंचाई आहे, तर दुसरीकडे लकडगंज झोनमध्ये पाणी वाहत असल्याचे चित्र या दौऱ्यादरम्यान दिसून आले. झोन कार्यालयात नळाला तोटी नाही, तेथून पाणी वाहत होते. कर्मचाऱ्यांचे त्याकडे दुर्लक्ष आहे. ओसीडब्ल्यूचे कार्यालय याच झोनमध्ये आहे मात्र, त्याचे लक्ष नसल्यामुळे दीपराज पार्डीकर यांनी कर्मचाऱ्यांना चांगलेच धारेवर धरले.

 नागरिकांच्या आणि कर्मचाऱ्यांच्या हिताच्या दृष्टीने महापालिका प्रशासनाने वेळेत बदल केला. त्याचे पालन कर्मचाऱ्यांनी करणे अपेक्षित आहे. मात्र, ते उशिरा येत असल्याचे दिसून आले. याची नोंद घेण्यात आली असून लेटलतिफ कर्मचाऱ्यांची यादी प्रशासनाकडून मागविली आहे. वारंवार जे कर्मचारी आणि अधिकारी उशिरा येतील त्यांच्यावर कारवाई करण्यासंदर्भात आयुक्तांशी चर्चा करण्यात येईल.

दीपराज पार्डीकर, प्रभारी महापौर महापालिका