ब्रिटीश कौन्सिलचा ‘ग्लोबल अल्युम्नी अवॉर्ड’ राजू केंद्रे यांना, या यादीत येणारे एकमेव भारतीय

२०२५ मध्ये फ्रान्स, भारत, नायजेरिया, पाकिस्तान, तुर्की, अमेरिका यांसारख्या २३ देशांमध्ये राष्ट्रीय स्तरावर पुरस्काराचे कार्यक्रम घेण्यात आले. या जागतिक विजेत्यांमध्ये एकलव्य इंडिया फाउंडेशन व एसओएसचे संस्थापक आाणि युनिव्हर्सिटी ऑफ लंडन चे माजी विद्यार्थी राजू केंद्रे यांचा समावेश आहे. त्यांना सामाजिक कार्य या श्रेणीत हा पुरस्कार मिळाला असून ते या यादीतील एकमेव भारतीय आहेत. या जागतिक पुरस्काराचा सोहळा मे २०२६ मध्ये वरिष्ठ ब्रिटीश कौन्सिल अधिकाऱ्यांच्या उपस्थितीत आयोजित करण्यात येणार आहे. तसेच, मार्च २०२५ मध्ये दिल्लीतील ब्रिटीश कौन्सिलच्या राष्ट्रीय सोहळ्यात त्यांना नॅशनल अल्युम्नी अवॉर्ड प्रदान करण्यात आला होता.

भटक्या आदिवासी समाजातील स्वतःच्या जीवनानुभवातून प्रेरणा घेऊन राजू केंद्रे यांनी ग्रामीण व आदिवासी भागातील पहिल्या पिढीतील विद्यार्थ्यांना उच्च शिक्षणाची दारे खुली करून देण्याचे काम हाती घेतले आहे. २०१७ मध्ये एकलव्य इंडिया फाउंडेशनची स्थापना झाल्यापासून त्यांनी ५ लाखांहून अधिक विद्यार्थ्यांपर्यंत जनजागृती व मार्गदर्शन पोहोचवले आहे. दोन हजारांहून अधिक विद्यार्थ्यांना शंभर पेक्षा नामांकित राष्ट्रीय व आंतरराष्ट्रीय विद्यापीठांत प्रवेश मिळवून दिला आहे. वंचित विद्यार्थ्यांसाठी सात दशलक्ष अमेरिकन डॉलर्सपेक्षा अधिक शिष्यवृत्ती उपलब्ध करून दिल्या आहेत.

या सन्मानाबाबत राजू केंद्रे काय म्हणाले ?

वर्ष २०२१-२२ माझ्यासाठी एक महत्वाचा टप्पा होता. एसओएएस, युनिव्हर्सिटी ऑफ लंडन येथे शिक्षण घेणे व चेव्हनिंग शिष्यवृत्ती मिळणे, यामुळे माझ्या वैयक्तिक प्रवासाबरोबरच एकलव्य इंडिया फाउंडेशनच्या कामाला मोठा हातभार लागला. उच्च शिक्षणाचे लोकशाहीकरण करणे आणि वंचित समुदायांतील विद्यार्थ्यांना नेतृत्वाच्या संधी उपलब्ध करून देणे यासाठी अजून बरेच काही करायचे आहे. आमचे ध्येय वंचित पार्श्वभूमीतील विद्यार्थी केवळ उच्च शिक्षण घेणार नाहीत, तर भविष्यात धोरणनिर्माते आणि निर्णय घेणारे नेते म्हणून पुढे येतील हा आहे. या सन्मानामुळे आम्हाला या दिशेने आणखी जोमाने काम करण्याची प्रेरणा मिळेल, असे राजू केंद्रे म्हणाले.