यवतमाळ – दहावी, बारावीच्या परीक्षेत दिव्यांग विद्यार्थ्यांसाठी लेखनिक म्हणून काम करणाऱ्या विद्यार्थ्यांना अतिरिक्त गुण देण्याबाबत सकारात्मक विचार केला जाईल, अशी ग्वाही जिल्ह्याचे पालकमंत्री संजय राठोड यांनी दिली. येथील जिल्हा शिक्षण व प्रशिक्षण संस्था (डायट) इमारतीच्या नूतनीकरण व विद्यार्थी गौरव सोहळ्यात ते बोलत हाते. यावेळी दिव्यांग विद्यार्थी, त्यांचे लेखनिक आणि पालकांचा विशेष गौरव करण्यात आला. पडद्यामागे राहून दिव्यांग विद्यार्थ्यांच्या यशाचे खरे शिल्पकार ठरलेल्या या लेखनिकांच्या निःस्वार्थ सेवेमुळे अनेकांचे भविष्य उज्ज्वल झाले आहे, असे कौतुकोद्गार पालकमंत्री संजय राठोड यांनी यावेळी काढले.
क्रीडा क्षेत्रातील विद्यार्थ्यांना दिल्या जाणाऱ्या अतिरिक्त गुणांच्या धर्तीवर दिव्यांग विद्यार्थ्यांसाठी लेखनिक म्हणून काम करणाऱ्या विद्यार्थ्यांनाही दहावी, बारावीत गुणांकनाचा लाभ दिला पाहिजे अशी मागणी यावेळी जिल्हा शिक्षण व प्रशिक्षण संस्थेचे प्राचार्य डॉ. प्रशांत गावंडे यांनी पालकमंत्री संजय राठोड यांच्याकडे केली. ही चांगली सूचना असल्याचे नमूद करून पालकमंत्री राठोड यांनी यासाठी प्रस्ताव सादर करण्याचे निर्देश माध्यमिक शिक्षणाधिकाऱ्यांना यावेळी दिले. लवकरच या संदर्भात शिक्षणमंत्र्यांशी चर्चा करून सकारात्मक निर्णय घेतला जाईल, अशी ग्वाही त्यांनी दिली.
जिल्ह्याची शैक्षणिक आणि सांस्कृतिक धरोहर असलेल्या येथील जिल्हा शिक्षण व प्रशिक्षण संस्थे (डायट)चे शिक्षण क्षेत्रात अमूल्य योगदान आहे. शिक्षण क्षेत्रातील मातृसंस्था असलेल्या ‘डायट’चा सर्वांगीण विकास करून संस्थेचे शैक्षणिक महत्व कायम राखले जाईल, असेही पालकमंत्री राठोड यावेळी बोलताना म्हणाले. कोविड काळात या संस्थेचे प्राचार्य डॉ. प्रशांत गावंडे यांनी राबविलेला ‘शाळा आई-बाबांची’ हा उपक्रम आकाशवाणीवरून देशभर गाजला, तर ‘फिजिओथेरपी घराघरात’ या नाविन्यपूर्ण संकल्पनेमुळे यवतमाळ जिल्ह्याचे नाव राष्ट्रीय पातळीवर झळकले, असे गौरवोद्गार मंत्री राठोड यांनी काढले.
संस्थेचे राहिलेली कामे पूर्ण करण्यासाठी तत्काळ प्रस्ताव सादर करून ही कामे पूर्ण करण्याच्या सूचना यावेळी पालकमंत्र्यांनी बांधकाम विभागाच्या कार्यकारी अभियंत्यांना दिल्या. यवतमाळ डायटमध्ये प्रशिक्षणासाठी येणाऱ्या महिला कर्मचाऱ्यांच्या शिशुकरीता येथे सर्वप्रथम हिरकणी कक्ष (मॉम अँड किड्स कंफर्ट झोन) सुरू करण्यात आला, याबद्दल पालकमंत्र्यांनी डायटच्या अधिव्याख्यात्यांचे कौतुक केले. कार्यक्रमास संस्थेचे प्राचार्य डॉ. प्रशांत गावंडे, माध्यमिक शिक्षणाधिकारी रवींद्र काटोलकर, ज्येष्ठ अधिव्याख्याता डॉ. देवानंद सावरकर, डॉ. रमेश राऊत, कार्यकारी अभियंता विक्रांत शिरभाते आदी उपस्थित होते.
साधन व्यक्तींना सेवेत कायम करण्याची मागणी
या कार्यक्रमास उपस्थित असलेल्या साधन व्यक्तींनी सेवेत कायम करण्याची मागणी पालकमंत्री राठोड यांच्याकडे केली. समग्र शिक्षा अंतर्गत सुमारे दोन हजार ५०० विषय साधनव्यक्तींना कायम सेवेत घेण्याबाबत लवकरच शिक्षण मंत्र्यांशी चर्चा करून आवश्यक सहकार्य केले जाईल, असे आश्वासन राठोड यांनी दिले.
