भंडारा : तुमसर तालुक्यातील एका गावात निर्माणाधीन इमारतीत देहव्यवसाय करीत असल्याची गोपनीय माहिती दहशतवाद विरोधी शाखेच्या पथकाला मिळाली. या माहितीच्या आधारे आज पोलिसांनी छापा टाकून देहव्यवसाय रॅकेटचा पर्दाफाश केला आणि दोघांना अटक केली. हा प्रकार उघडकीस येताच सर्वत्र खळबळ उडाली आहे.
या कारवाईत दोन मुख्य आरोपींना अटक करण्यात आली असून, त्यांच्यावर अनैतिक व्यापार प्रतिबंधक कायद्यांतर्गत गुन्हा दाखल करण्यात आला आहे. ही कारवाई गुरुवार, १८ सप्टेंबर रोजी भंडारा येथील दहशतवाद विरोधी शाखेच्या पथकाने केली आहे.
दहशतवाद विरोधी शाखेला एका गुप्त सूत्राकडून मिळालेल्या माहितीच्या आधारे ही कारवाई करण्यात आली. तुमसर येथील वैभव अनिरुद्ध बोरकर (४०, रा. आंबेडकर वार्ड, तुमसर जि. भंडारा) आणि भारत सुखदेव कोल्हाडकर (३६, रा. शिवाजी वार्ड, तुमसर जि. भंडारा) हे दोघे मिळून मेहेगाव येथे बांधकाम सुरू असलेल्या घरामध्ये देहव्यवसायाचा अड्डा चालवत होते.
हे दोघे आर्थिक फायद्यासाठी महिलांना पैशांचे आमिष दाखवून त्यांना या व्यवसायात ढकलत होते. माहितीची खात्री पटल्यानंतर, तुमसरचे उपविभागीय पोलिस अधिकारी मयंक माधव यांच्या आदेशानुसार ही कारवाईची योजना आखण्यात आली. या कारवाईसाठी गोबरवाही पोलिस ठाण्याचे पोलिस निरीक्षक शरद शेवाळे यांची विशेष पोलीस अधिकारी म्हणून नियुक्ती करण्यात आली.
पथकाने बनावट ग्राहक पाठवून या माहितीची पडताळणी केली. बनावट ग्राहकाने दिलेल्या माहितीनुसार, आरोपी वैभव बोरकर आणि भारत कोल्हाडकर हे दोघे महिला पुरवत होते आणि ग्राहकांकडून पैसे घेत होते. पुराव्यांची खात्री झाल्यानंतर, पोलिस पथकाने पंचांसमक्ष त्या घरात छापा टाकला. छाप्यात पोलिसांनी देहव्यवसायासाठी वापरले जाणारे साहित्य आणि रोख रक्कम जप्त केली. तसेच, या अड्ड्यामध्ये सापडलेल्या एका महिलेची सुटका करण्यात आली.
त्या महिलेने दिलेल्या माहितीनुसार, ती भारत कोल्हाडकर याच्या सांगण्यावरून येथे येत होती आणि ग्राहकांकडून मिळणाऱ्या पैशांतील काही भाग त्याला देत होती. या कारवाईनंतर आरोपींना अटक करण्यात आली असून, त्यांच्यावर कलम ३, ४, ५, अनैतिक व्यापार प्रतिबंधक अधिनियम १९५६ अन्वये गुन्हा दाखल करण्यात आला आहे.
