जळगावात कचरा कोंडी कायम… ‘बीव्हीजी’ला कंत्राट दिल्यानंतरही नागरिकांचे हाल!

शहरातील स्वच्छतेचे बारा वाजल्यानंतर नवीन कंत्राट दिल्यानंतर तरी प्रश्न सुटेल, अशी अपेक्षा बाळगली जात होती. प्रत्यक्षात, बीव्हीजी इंडिया कंपनीने काम सुरू करून आठवडा उलटला तरी कचरा कोंडी कायम आहे.

Garbage problem continues in Jalgaon city

जळगावात कचरा कोंडी कायम… ‘बीव्हीजी’ला कंत्राट दिल्यानंतरही नागरिकांचे हाल! (लोकसत्ता टिम)

जळगाव – शहरातील स्वच्छतेचे बारा वाजल्यानंतर नवीन कंत्राट दिल्यानंतर तरी प्रश्न सुटेल, अशी अपेक्षा बाळगली जात होती. प्रत्यक्षात, बीव्हीजी इंडिया कंपनीने काम सुरू करून आठवडा उलटला तरी कचरा कोंडी कायम आहे. महापालिका प्रशासनाचेही संबंधितांकडे अजिबात लक्ष नसल्याने नागरिकांनी डोक्याला हात मारून घेतला आहे.

महानगरपालिकेने नाशिक येथील वॉटरग्रेस कंपनीला २०१८ मध्ये शहरातील सफाईचे कंत्राट पाच वर्षांसाठी दिले होते. याशिवाय, गेल्या वर्षी ऑगस्ट महिन्यात नवीन निविदा प्रक्रिया मंजूर होईपर्यंत काम करण्याच्या अटीवर वॉटरग्रेसला पुन्हा मुदतवाढ देण्यात आली होती. दरम्यान, आधीची पाच वर्षे आणि मुदतवाढ दिलेल्या एका वर्षात सातत्याने स्वच्छतेच्या कामात कुचराई केल्याने सत्ताधारी आणि विरोधकांच्या तसेच कर भरणाऱ्या नागरिकांच्या तीव्र असंतोषाला वॉटरग्रेस पर्यायाने महापालिकेला तोंड द्यावे लागले आहे. त्यानंतरही जळगावमधून गाशा गुंडाळण्याची तयारी करण्याऐवजी वॉटरग्रेसने आता नव्याने राबविण्यात येत असलेल्या निविदा प्रक्रियेत पुन्हा सहभाग घेतला. सफाईचे कंत्राट घेण्यासाठी स्पर्धेत असलेल्या बीव्हीजी इंडिया कंपनीने सर्वात कमी दरावर काम करण्याची तयार दर्शविल्यावर वॉटरग्रेसने न्यायालयाचे दार ठोठावले.

परिणामी, जळगाव शहरातील स्वच्छतेचे कंत्राट देण्याच्या प्रक्रियेला बराच विलंब झाला. दरम्यानच्या काळात वॉटरग्रेस कंपनीने आपल्यालाच सफाईचे कंत्राट मिळावे, यासाठी दाखल केलेल्या याचिकेवर ११ ऑगस्ट रोजी उच्च न्यायालयात सुनावणी पूर्ण झाली. न्यायालयाने बीव्हीजीच्या बाजुने निकाल दिल्यानंतर संबंधितांनी एक सप्टेंबरपासून प्रत्यक्ष कामाला सुरुवात देखील केली. महापालिकेचे आयुक्त ज्ञानेश्वर ढेरे तसेच आरोग्य विभागाचे सहाय्यक आयुक्त उदय पाटील यांनी घनकचरा व्यवस्थापन कार्याची मोठ्या थाटात सुरूवात केली. परंतु, बीव्हीजी कंपनीकडून नव्याचे नऊ दिवसही जळगावमधील स्वच्छता व्यवस्थित झाली नाही.

हेही वाचा

अपंग शाळांच्या नवीन वेळापत्रकावर आक्षेप; अंमलबजावणी स्थगित

बीव्हीजी इंडिया कंपनीने जळगाव शहराच्या स्वच्छतेचे कंत्राट मिळाल्यानंतर सुमारे ५०० सफाई कर्मचारी, १५५ चालक आणि १५५ सहायकांची भरती केल्याचा दावा केला आहे. सर्व प्रभागात जाऊन कचरा संकलनासाठी गाड्यांची व्यवस्थाही करण्यात आल्याचे सांगितले जात आहे. या नव्या व्यवस्थेमुळे शहरातील घनकचरा संकलन आणि व्यवस्थापनाची प्रक्रिया अधिक सुलभ होईल, अशी आशा नागरिकांनी व्यक्त केली होती. परंतु, कंत्राटदार कंपनीला आठवडा उलटला तरी जळगावमधील घनकचरा व्यवस्थापन जमलेले नाही. शहरातील बऱ्याच भागात अजुनही कचऱ्याचे ढीग साचल्याचे दिसून येत आहे. कंत्राटदार कंपनीकडून दररोज साचलेला कचरा उचलला जाणे अपेक्षित असताना, तो कधीतरी उचलला जात आहे. परिणामी, अस्वच्छतेसह दुर्गंधीचा प्रश्न पूर्वीपेक्षा आणखी जास्त बिकट झाल्याचे चित्र आहे. या बद्दल नागरिकांनी तीव्र नाराजी व्यक्त केली आहे.