जळगाव : जिल्ह्यातील जामनेरमध्ये नगराध्यक्षपदावर आपल्या सौभाग्यवतींची वर्णी लावण्यासाठी भाजप नेते मंत्री गिरीश महाजन यांचे काही दिवसांपासून प्रयत्न सुरू होते. अखेर, साधना महाजन यांनी सोमवारी नगराध्यक्षपदासाठी उमेदवारी अर्ज दाखल केला. या वेळी भाजपने जोरदार शक्तिप्रदर्शनही केले.
स्थानिक स्वराज्य संस्थांच्या निवडणुकांसाठी उमेदवारी अर्ज दाखल करण्यास सुरुवात होताच महायुती आणि महाविकास आघाडीतील प्रमुख नेते मंडळींमध्ये सर्वाधिक जागांवर सत्ता मिळवण्याची चढाओढ सुरू झाली आहे. या मोर्चेबांधणीमध्ये भाजप लोकसभा आणि विधानसभा निवडणुकांप्रमाणेच स्थानिक पातळीवरही आपले वर्चस्व कायम राखण्याच्या तयारीत आहे.
मंत्री गिरीश महाजन, संजय सावकारे तसेच आमदार मंगेश चव्हाण यांनी गेल्या काही दिवसांपासून आपल्या कुटुंबातील सदस्यांना नगराध्यक्षपदांसाठी संधी देण्याच्या दिशेने हालचाली सुरू केल्याची चर्चा राजकीय वर्तुळात मोठ्या प्रमाणावर होती. मात्र, या सर्व चर्चांबाबत तिघांनीही एवढ्या दिवसांत कोणतीही थेट प्रतिक्रिया दिली नव्हती. परंतु, आता उमेदवारी अर्ज दाखल करण्याची प्रक्रिया प्रत्यक्षात सुरु झाल्यानंतर सर्व नेत्यांनी हळूहळू आपले पत्ते उघड करण्यास सुरुवात केली आहे. यामुळे गेल्या काही दिवसांपासून सुरू असलेल्या चर्चांना पुष्टी मिळाल्याचे चित्र दिसत आहे.
भुसावळमध्ये नगराध्यक्षपदाचे आरक्षण अनुसूचित जाती महिला राखीव निघाल्यानंतर त्या जागी आपल्या सौभाग्यवतींची वर्णी लावण्यासाठी राज्याचे वस्त्रोद्योग मंत्री संजय सावकारे प्रयत्नशील होते. प्रत्यक्षात, रजनी सावकारे यांनी शुक्रवारी भाजपकडून नगराध्यक्षपदासाठी आपला उमेदवारी अर्ज दाखल केला. याशिवाय, जामनेरमध्येही यंदा नगराध्यक्षपदाचे आरक्षण सर्वसाधारण महिला राखीव निघाले आहे. त्यामुळे त्या जागी आपल्या सौभाग्यवती साधना महाजन यांची वर्णी लावण्यासाठी मंत्री महाजन यांचे प्रयत्न सुरू असल्याची चर्चा काही दिवसांपासून होती.
यापूर्वीही एकदा साधना महाजन या जामनेरच्या नगराध्यक्षा राहिलेल्या आहेत आणि त्यांना त्या पदाचा चांगला अनुभव आहे. अखेर, सोमवारी साधना महाजन यांनी भाजपने अधिकृत उमेदवारी दिल्यानंतर नगराध्यक्षपदासाठी त्यांचा अर्ज दाखल केला.
चाळीसगावमध्येही शहर विकास आघाडीने नगराध्यक्षांसह नगरसेवकांच्या पदांसाठी तुल्यबळ उमेदवार देऊन भाजपची कोंडी करण्याचा प्रयत्न केला असताना, त्या जागी आपल्या सौभाग्यवती प्रतिभा चव्हाण यांची वर्णी लावण्यासाठी भाजप आमदार मंगेश चव्हाण यांनी काही दिवसांपासून हालचाली वाढवल्या होत्या. प्रतिभा चव्हाण यांची उमेदवारी निश्चित झाल्याचेही बोलले जात होते.
दरम्यान, माझ्या घरातील कोणताच सदस्य सार्वजनिक निवडणुकीत उभा राहणार नाही, असे आमदार चव्हाण यांनी यापूर्वीच जाहीर केले होते. प्रत्यक्षात, प्रतिभा चव्हाण यांच्या समवेत जवळपास ३६ जणांनी नगरसेवकपदासाठी सोमवारी मोठ्या जल्लोषात अर्ज दाखल केल्याने राजकीय वर्तुळातून आश्चर्य व्यक्त करण्यात आले.
