सिटीलिंकच्या बस फेऱ्यांना कात्री ? उत्पन्न-खर्चाचा मेळ साधण्याची कसरत

सिटीलिंकच्या नुकसानीचा मोठा भार महापालिकेवर पडतो. सिटीलिंकचे उत्पन्न वाढविण्यासाठी तिकीटाव्यतिरिक्त नवनवीन स्त्रोत निर्माण करावेत. उत्पन्न वाढीसाठी उपाय योजना कराव्यात, असे खत्री यांनी म्हटले आहे. सिटीलिंकने प्रवाशांना उत्कृष्ट सेवा देण्याबरोबरच उत्पन्न कसे वाढविता येईल, यासाठी उपाय योजनेची गरज त्यांनी मांडली. सध्या सिटीलिंक ज्या मार्गांवर सेवा देत आहे, यातील सर्वात कमी प्रतिकिलोमीटर मार्गांचा अभ्यास केला जाईल, आवश्यकता भासल्यास काही बसफेऱ्या बंद करण्याची सूचना बैठकीत देण्यात आली. या शिवाय, सकाळी आठ वाजेपूर्वी व रात्री आठ वाजेनंतर कमी उत्पन्न देणाऱ्या बसेसचा अभ्यास केला जाणार आहे. या बसच्या फेऱ्या कमी करण्याची तयारी करण्यात आली.

ऑनलाईन पास, तिकीट खरेदी-विक्री करण्यावर अधिक भर देण्यासाठी प्रवाशांना युपीआयद्वारे पैसे देण्याची सेवा उपलब्ध करून देण्याचे नियोजन करण्यात आले. यासाठी ऑगस्टच्या अखेरपर्यंत नवीन यंत्र उपलब्ध करून प्रवाशांना ऑनलाईनची सेवा देण्याचे आयुक्त खत्री यांनी सूचित केले. तिकीट व पास व्यतिरिक्त अन्य कोणत्या मार्गावर सिटीलिंकचे उत्पन्न वाढविता येईल याबाबत नियोजन केले जाणार आहे. बैठकीत सिटीलिंकचे मुख्य महाव्यवस्थापक बाजीराव माळी, मुख्य लेखा व वित्त अधिकारी सुरेखा जाधव, महाव्यवस्थापक (वाहतूक) मिलिंद बंड, महाव्यवस्थापक (प्रशासन व तांत्रिकी) रघुनाथ कांबळे यांसह अधिकारी उपस्थित होते.

इलेक्ट्रीक बसची प्रतिक्षाच…

महानगरपालिकेच्या सिटीलिंकच्या ताफ्यात इलेक्ट्रिक बस समाविष्ट करण्याचा मुहूर्त वेगवेगळ्या कारणांमुळे लांबणीवर पडत आहे. पीएम इ बस योजनेंतर्गत मनपास ५० इ बसेस मंजूर झाल्या आहेत. सध्या कार्यरत डिझेल बसऐवजी इ बस वापरण्याचा प्रस्ताव शासनाला पाठविला जाणार आहे. सिटीलिंक बससेवेला चार वर्षे झाली असताना प्रारंभी निश्चित केल्यानुसार इ बस रस्त्यांवरून आजतागायत धावू शकलेल्या नाहीत. सध्या सिटीलिंक बससेवा २०० सीएनजी तर, ५० डिझेल बसने प्रवासी वाहतूक करते.