कठीण परिस्थितीवर जिद्दीने मात

नाशिक : महाराष्ट्र पोलीस अकादमीतील प्रशिक्षणात सर्वोत्कृष्ट कामगिरीबद्दल मानाची तलवार मिळविणारे उपनिरीक्षक संतोष कामटे (सोलापूर, करमाळा) असो, अथवा महिला गटात उत्कृष्ट कामगिरी नोंदविणाऱ्या विवाहित असलेल्या विजया पवार असोत. दोघांनीही कठीण परिस्थितीवर जिद्दीने मात करत हे यश संपादित केले.कामटे आणि पवार यांना मुख्यमंत्र्यांच्या हस्ते सन्मानित करण्यात आले.

सोलापूरच्या करमाळा भागातील कामटे यांचे आई-वडील शेतमजुरी करतात. घरची परिस्थिती अतिशय बेताची. शिक्षणाची पार्श्वभूमी नसतांना कामटे यांनी कला शाखेतून पदवी मिळवून नंतर डी.एड्. केले. शिक्षक म्हणून नोकरीचा शोध घेत असतांना ते स्पर्धा परीक्षांची तयारी करत होते. प्रशिक्षणात प्रामाणिकपणे प्रयत्न केले. पण सर्वोत्कृष्ट ठरणार, याची कल्पना नव्हती, असे त्यांनी नमूद केले. पुढील काळात उपअधीक्षक पदासाठी परीक्षा देण्याचा मानस त्यांनी व्यक्त केला.

सर्वोत्कृष्ट प्रशिक्षणार्थी (द्वितीय) आणि महिलांमध्ये सवरेत्कष्ट कामगिरीबद्दल पारितोषिक मिळवणाऱ्या नाशिक येथील विजया पवार यांनी सर्वाना पिछाडीवर टाकले. ११ वर्षांचा मुलगा, पावणेचार वर्षांची मुलगी आईचा गौरव सोहळा पाहण्यास आले होते. विजया यांचे पती देवळा तालुक्यातील दहिवड आश्रमशाळेत परिचर आहेत. विजया यांचे के.टी.एच.एम.महाविद्यालयात १२ वीपर्यंत शिक्षण झाल्यानंतर पुढे कला पदवी, डी.एड.चे शिक्षण घेऊन त्यांनी देवळा तालुक्यात दोन वर्ष इंग्रजी शाळेत शिक्षिका म्हणून कामही केले. याच काळात स्पर्धा परीक्षेची तयारी समांतरपणे सुरू होती. त्या तयारीनेच त्यांना आजचा दिवस दाखविला.

 सीमा सुरक्षा दलाच्या तळांवरही प्रशिक्षण

एकूण १४ महिन्यांच्या प्रशिक्षणात या तुकडीला आंतरवर्ग आणि बाह्य़वर्ग प्रशिक्षण देण्यात आले. बाह्य़ प्रशिक्षणात प्रशिक्षणार्थीनी प्रथमच सीमा सुरक्षा दलाच्या (बीएसएफ) सीमावर्ती भागातील तळांवर आठवडाभराचे प्रशिक्षण घेतले.

हा अनुभव समृध्द करणारा ठरल्याची प्रतिक्रिया अनेकांनी व्यक्त केली. बीएसएफच्या मिझोराम, आगरतळा, मेघालय, जम्मू-काश्मीर, पंजाब, राजस्थान, गुजरात, पश्चिम बंगाल, आसाम या तळांवर हे प्रशिक्षण झाले. याशिवाय कवायत, शस्त्र कवायत, जंगल कॅम्प, आधुनिक शस्त्र चालविणे, चारचाकी वाहन चालविण्याचे प्रशिक्षण देण्यात आले. प्रशिक्षणार्थी लोकसभा, विधानसभा निवडणूक, गणेशोत्सव बंदोबस्तात सहभागी झाले. आंतरवर्ग प्रशिक्षणात गुन्हे, तपास, गुन्हे प्रतिबंध, कायदा आणि सुव्यवस्था, अंगुली मुद्रा तंत्रज्ञान, पोलीस ठाणे व्यवस्थापन, मानवी वर्तणूक, संगणक, दहशतवाद, सायबर आणि आर्थिक गुन्हे तपास आदींवर प्रशिक्षण देण्यात आले.

‘शहीद वडिलांची स्वप्नपूर्ती’

मुंबई वाहतूक पोलीस शाखेत शिपाई असणारे वडील विलास शिंदे हे खार येथे ऑगस्ट २०१६ मध्ये सेवा बजावत होते. दुचाकीस्वारावर कारवाई करतांना समाजकंटकांनी केलेल्या हल्ल्यात जखमी होऊन दवाखान्यात त्यांचे निधन झाले. शहीद वडिलांच्या स्वप्नपूर्तीसाठी आपण पोलीस दलात सहभागी झाल्याचे उपनिरीक्षक दीपेश शिंदे यांनी सांगितले.  विज्ञान शाखेतून माहिती तंत्रज्ञानचे शिक्षण घेणाऱ्या दीपेशने पोलीस दलात मोठा अधिकारी व्हावे, अशी वडिलांची इच्छा होती.  त्यांच्या निधनानंतर तत्कालीन महासंचालक दत्ता पडसलगीकर यांच्याशी भेट झाली.त्यांनी उच्चशिक्षित असल्याने उपनिरीक्षक पदासाठी नियुक्ती दिल्याने प्रशिक्षण पूर्ण केले.   वडिलांची इच्छापूर्ती झाल्याची  भावना दीपेश यांनी व्यक्त केली.