सक्षम आरोग्य सेवेसाठी पालिकेची त्रिसूत्री

नवी मुंबई : नवी मुंबई पालिकेच्या आरोग्य विभागाची ढासळलेली प्रकृती सुधरावी यासाठी पालिका आयुक्त अभिजित बांगर यांनी त्रिसूत्री कार्यक्रम ठरविला आहे. त्यातील एक भाग म्हणून कोविड रुग्णालयात काम करणाऱ्या वैद्यकीय कर्मचाऱ्यांना काही खासगी रुग्णालयात प्रशिक्षण घेण्याचा प्रयत्न केला जाणार आहे, तर खासगी रुग्णालयांतील कर्मचाऱ्यांनाही पालिकेचे कामकाज जवळून पाहण्याची संधी दिली जाणार आहे. या विभागाचा स्वतंत्र कारभार पाहत असलेल्या वैद्यकीय क्षेत्रातील उपायुक्त दर्जाचा अधिकारी लवकरच नियुक्त केला जाणार आहे.

कोविड साथ रोगाच्या निमित्ताने नवी मुंबई पालिकेच्या आरोग्य विभागाची लक्तरे वेशीवर टांगली जात आहेत. कोविड साथ रोगाचा सामना करण्यासाठी उभारण्यात आलेली आरोग्य यंत्रणा मागील दोन महिन्यांत सावरू लागली आहे. या विभागात जबाबदारी झटकण्याच्या वृत्तीवर पालिका आयुक्त बांगर यांनी नुकत्याच घेतलेल्या बैठकीत झाडाझडती घेतलेली आहे. आरोग्य विभागात सुरू असलेली अनागोंदी संपविण्यासाठी लवकरच अनेक डॉक्टर आणि डॉक्टरेतर कर्मचाऱ्यांच्या बदल्या केल्या जाणार आहेत. याशिवाय आरोग्य विभागाचा मुख्य वैद्यकीय अधिकारी म्हणून नवीन अधिकाऱ्याच्या हातात सूत्रे दिली जाणार असून या विभागाचा स्वतंत्र कारभार व देखरेख ठेवण्यासाठी नवीन अधिकाऱ्याची नियुक्ती लवकरच केली जाणार आहे.

आरोग्य विभागाच्या या झाडाझडतीनंतर कोविड रुग्णालयात काम करणाऱ्या काही कर्मचाऱ्यांना अपोलो, फोर्टिज या खासगी रुग्णालयांत प्रशिक्षणासाठी पाठविले जाणार आहे. करोनाकाळात शून्य मृत्युदर आणण्याचा संकल्प पालिकेने सोडलेला आहे. त्यासाठी प्रयत्न केले जात असून दररोज संध्याकाळी शहरात झालेल्या कोविड मृतांचा अहवाल सादर करून त्यावर चर्चा केली जात आहे. या चर्चेत रिलायन्स, तेरणा यांसारख्या खासगी रुग्णालयांतील निष्णात डॉक्टरांची सल्ला घेतला जात आहे. त्यांच्याशी प्रत्येक कोविड मृत्यूबद्दल चर्चा केली जात असून मृत कोविड रुग्णाला देण्यात आलेल्या उपचारांबद्दल माहिती घेतली जात आहे. ही पद्धत मोठय़ा खासगी रुग्णालयातील रुग्णाबाबत कशा प्रकारे अवलंबिली जाते ते पाहिले जाणार आहे. पालिका करीत असलेल्या उपाययोजना खासगी रुग्णालयांतील कर्मचारी व डॉक्टरांनी पाहावी यासाठी ही कर्मचारी अदलाबदल केली जाणार आहे.

डी. वाय. पाटील रुग्णालयात जास्तीत जास्त अत्यवस्थ रुग्णांसाठी रुग्णशय्या राखीव ठेवण्याचा प्रयत्न केला जात आहे.

ज्ञानाची देवाणघेवाण

पालिकेची आरोग्य यंत्रणा या कोविड काळात सक्षमपणे कार्य करीत आहे. त्यात काही सुधारणा करण्याची आवश्यकता असल्याने आरोग्य यंत्रणेत काही फेरफार व बदल केले जाणार आहेत. उपायुक्त दर्जाचा एक अधिकारी स्वतंत्र या यंत्रणेचा कारभार पाहील अशी तजवीज केली जाणार आहे. खासगी रुग्णालयातील कर्मचारी पालिकेत आणि पालिकेचे कर्मचारी खासगी रुग्णालयांत सेवा देऊन आपल्या ज्ञानाची देवाणघेवाण करणार असल्याचे पालिकेचे आयुक्त अभिजित बांगर यांनी सांगितले.