मुंबई-पुणे द्रुतगती महामार्गावरील सीसीटिव्ही कॅमेरा बंदच

९४.५ किलोमीटर अंतरावर तातडीने मुंबईहून पुण्याला जाता यावे यासाठी हा महामार्ग बांधण्यात आला. मागील २२ वर्षापासून शेकडो प्रवाशांचे या महामार्गात जिव गेले. प्रत्येक अपघातावेळी सरकारचे मंत्री द्रुतगती महामार्गालगत तातडीने जखमींना उपचार मिळावेत म्हणून ट्रामा सेंटर, वाहनांच्या गती नियंत्रणासाठी सीसीटिव्ही कॅमेरे, हॅलिपॅड याविषयी घोषणा करते. परंतू मंत्र्याच्या या घोषणा शेवटपर्यंत घोषणाच राहत आहेत. सर्वाधिक अपघात द्रुतगती महामार्गावर होत असल्याने मृत्यूचा मार्ग अशी ओळख या द्रुतगती महामार्गाला मिळाली. अपघातांवर नियंत्रणासाठी तज्ज्ञांच्या समितीने वाहनांच्या गती आणि अपघातावेळी देखरेखीसाठी एमएसआरडीसीने ९४.५ किलोमीटर अंतरावर ४०० सीसीटिव्ही कॅमेरे बसविण्याचा निर्णय घेतला. हे कॅमेरा बसविण्याचे काम पुर्ण झाले असले तरी प्रत्यक्षात यातील अनेक कॅमेरे बंद असल्याचे सोमवारच्या अपघातावेळी उजेडात आले.

हेही वाचा : द्रुतगती महामार्गावरील अपघात कसा झाला? चुक कोणाची? नेमकं काय झालं?

कॅमेरांसोबत अवजड वाहने क्षमतेपेक्षा अधिक वाहतूक द्रुतगती महामार्गावरुन करत असल्याने वजनकाटे महामार्गातील पथकर नाक्यांवर अनेक ठिकाणी बसविण्याचा प्रस्ताव कागदावरच राहीला. ट्रामासेंटरमधील अस्थिरोग तज्ज्ञ, न्युरोसर्जन, मनक्याचे तज्ज्ञ यांचा अभाव असल्याची बाब समोर आली. कळंबोली येथून हा द्रुतगती महामार्ग सूरु होतो. दुचाकी, ट्रक्टर, सायकल या वाहनांवर द्रुतगती महामार्गावर प्रतिबंध केले आहे. मात्र ही वाहने रोखण्यासाठी कोणतीही यंत्रणा उपलब्ध केली नाही. सोमवारी ट्रक्टरचा चालक तरेवाज अहमद याने चुकून ट्रक्टर द्रुतगती महामार्गावर चढविल्याचे बोलले जात आहे. मात्र तरेवाजचा ट्रक्टर रोखणारी यंत्रणा द्रुतगती महामार्गावर नव्हती. द्रुतगती महामार्गावर सीसीटिव्ही यंत्रणा कार्यान्वित कधी होणार याची माहिती विचारण्यासाठी महामार्ग वाहतूक विभागाचे पोलीस निरिक्षक शेंडगे यांच्याशी संपर्क साधल्यावर त्यांनी पंढरपूर येथे बंदोबस्तासाठी असल्याचे सांगीतले. काही दिवसांपूर्वीच पोलीस अधिकारी शेंडगे यांनी त्यांच्या पदाचा पदभार स्विकारला आहे.