बोर्डी येथील रस्त्यास स्थानिकांचा विरोध

चौदाव्या वित्त आयोगांतर्गत बोर्डी ग्रामपंचायतीला प्राप्त झालेल्या निधीमधून गावातील जैन मंदिर ते हरिभाई पटेल मिल दरम्यानच्या रस्त्याचे काँक्रीटीकरण करण्याचा प्रस्ताव ग्रामपंचायतीने दिला आहे. परंतु या रस्त्यावरील पावसाच्या पाण्याचा निचरा होण्याचे योग्य नियोजन केलेले नाही तसेच रस्ता, अरुंद आणि वळणाचा असल्याने येथे काँक्रीटीकरण केल्यास घरांमध्ये पाणी शिरेल, अशी शक्यता नागरिकांनी बोलून दाखवली आहे. त्याचमुळे या रस्त्याला त्यांचा विरोध आहे.

बोर्डी गावातील अनेक मुख्य रस्त्यांची दुरवस्था झाली असून त्यांच्याही दुरुस्तीची गरज असताना केवळ राजकीय हेतूने सदर रस्ताउभारणी सुरू असल्याचे आरोप करण्यात येत आहेत. रस्त्याच्या उभारणीविषयी ग्रामसभेच्या विषयपत्रिकेवर कोणतीही आगाऊ सूचना न देता, ग्रामसभेत आयत्या वेळेचा विषय घेऊन मंजुरी दाखविली गेली. त्यामुळे ग्रामसभेच्या नियमांचे उल्लंघन तसेच संकेतांना बगल देऊन या रस्त्याबाबतचा ठराव चुकीच्या पद्धतीने संमत करण्यात आल्याचे तक्रारदार नागरिकांचे म्हणणे आहे. या विरोधात त्यांनी पालघर दिवाणी न्यायालयात अर्ज दाखल केला आहे.

रस्त्याची उभारणी करताना तेथील रहिवाशांना त्याचा त्रास होणार नाही, याची जबाबदारी ग्रामपंचायतीची असते. तसेच रस्त्याचे नियोजन करतेवेळीही पाण्याचा निचरा करणाऱ्या व्यवस्थेची आखणी करणे, अत्यंत गरजेचे असते. परंतु केवळ राजकीय सूडभावनेने प्रेरित होत, या रस्त्याची उभारणी केली जात आहे, असा आरोप ग्रामस्थ करत आहेत. याप्रकरणी जिल्हा परिषदेचे मुख्य कार्यकारी अधिकारी, डहाणू पंचायत समितीचे सभापती तसेच इतर विविध स्तरांवर तक्रारी करण्यात आल्या आहेत.