मुसळधार पावसाने डहाणू बस स्थानक आणि आगारात पाणी घुसल्याने अनेक बस रद्द, प्रवाशांचे हाल

पालघर जिल्ह्यात सध्या मुसळधार पाऊस सुरू आहे. तसेच हवामान खात्याने पुढील तीन चार दिवसांत जोरदार पावसाची शक्यता वर्तवली आहे. काल दिनांक १३ जुलै रोजी दुपारनंतरसुद्धा वेगवान वारे आणि मुसळधार पाऊस पडला. मुसळधार पावसाने अनेक सखल भागात मोठ्या प्रमाणात पाऊस पडला आहे. डहाणू शहरातसुद्धा मुसळधार पावसाने अनेक ठिकाणी मोठ्या प्रमाणात पाणी साचले. डहाणू बसस्थानक आणि आगारातसुद्धा मोठ्या प्रमाणात पाणी साचले होते. पाऊस सुरूच असल्याने व पाणी वाढत असल्याने बस आगारात उभ्या असलेल्या अनेक बस सुरक्षित ठिकाणी हलवण्यात आल्या. बसस्थानकातसुद्धा मोठ्या प्रमाणात पाणी साचल्याने डहाणू येथून दुपारनंतर जाणाऱ्या अनेक बस रद्द करण्यात आल्या. त्यामुळे बसने प्रवास करणारे अनेक प्रवासी व विद्यार्थी यांचे हाल झाले. जोरदार पाऊस पडत असल्याने खाजगी वाहने मिळणेसुद्धा अवघड झाले होते. त्यामुळे बसची वाट पाहणाऱ्या प्रवाशांना मिळेल त्या साधनाने प्रवास करत घर गाठावे लागले. बस स्थानकात पाणी साचले असले तरी सागर नाका येथून तरी बस सोडाव्यात अशी मागणी प्रवाशी करत होते. परंतु आगारातील बस दुसरीकडे हलविण्यात आल्याने बस सोडता आल्या नाही.

हेही वाचा – शहरबात : उशिरा सुचलेले…

हेही वाचा – तारापूर औद्योगिक वसाहतीमध्ये मध्ये वायुगळती, शिवाजीनगर परिसरात नागरिकांना चक्कर येण्याचे प्रकार

पावसाचा अहवाल, पालघर जिल्हा

कालावधी १३/०७ (८:३० सकाळ) ते १४/०७(८:३० सकाळपर्यंत)

स्रोत – संकेतस्थळ, कृषि विभाग, महाराष्ट्र

तालुका – आजचा पाऊस

वसई – १२५.९
वाडा – १७४.६
डहाणू – १०१.१
पालघर – ८०.८
जव्हार – ३७.०
मोखाडा – ४९.२
तलासरी – ७४.१
विक्रमगड – १२९.१

सरासरी पाऊस, पालघर जिल्हा = १०४.२ मिमी