मे चा मध्य उजाडला तरी नालेसफाईला मुहूर्त सापडेना

पालघर नगर परिषदेने रस्ते बांधणी, गटार बांधणी अशा विकास कामांचा सपाटा लावला असताना नालेसफाईकडे मात्र दुर्लक्ष झाल्याचे दिसून येत आहे. नगरपरिषद क्षेत्रात अनेक लहान मोठ्या गटारी व नाले असून यामध्ये आजूबाजूच्या भागातील कचरा, वाढलेली झाडे झुडपे, नाल्याची खोली यासह सांडपाणी, गाळ व कचऱ्यामुळे पावसाळ्यामध्ये पाणी वाहून जाताना अडचणी निर्माण होतात. पावसाचे पाणी तुंबून राहू नये व त्याचा योग्य निचरा व्हावा याकरिता पावसाळ्यापूर्वीच तातडीने नालेसफाई करणे गरजेचे आहे.

नुकत्याच अवकाळी पावसाने सुरू होणाऱ्या पावसाचा इशारा दिला असून पुढील काही दिवसात पावसाला प्रारंभ होण्याची शक्यता आहे. मात्र नगरपरिषद क्षेत्रातील नालेसफाईला अद्याप सुरुवात न झाल्याने पावसात पाणी तुंबून आपत्ती ओढावल्यास याला नगरपरिषद जबाबदार असेल अशी तक्रार नागरिक करत आहेत. तसेच नाल्याची सफाई वेळेत न झाल्यास यंदा पालघर शहर पूर्ण पाण्याखाली जाणार असल्याची भीती व्यक्त करण्यात येत आहे. तर उशिरा सुरू होणारे काम ठेकेदारांकडून घाईघाईत पूर्ण केल्यास कामाच्या दर्जाबाबत चिंता व्यक्त होऊ शकते. याकडे प्रशासनाने लक्ष घालावे अशी मागणी पालघरवासीयांनी केली आहे.

एप्रिल २०२४ मध्ये नगर परिषदेच्या कार्यकारिणीचा कार्यकाळ समाप्त झाला असून प्रशासक राजवट सुरू आहे. तसेच प्रभारी मुख्याधिकारी म्हणून डहाणूचे मुख्याधिकारी कार्यरत आहेत. याबाबत त्यांच्याशी संपर्क होऊ शकला नाही. तसेच याबाबत नगरपरिषदेच्या आरोग्य विभागाकडे विचारणा केली असता त्यांनी उत्तर देण्याचे टाळले.

मान्सून पूर्व कामे

प्रशासनाने सर्व विभागांना मान्सून पूर्व कामे पूर्ण करण्याच्या सूचना दिल्या असून पावसाळ्या पूर्वी नालेसफाई, रस्त्यावर साईनबोर्डवर आलेल्या आणि विजेच्या तारांवर आलेल्या झाडांच्या फांद्या कापणे, वाकलेले विजेचे खांब सरळ करणे, विजेच्या तारा सरळ करणे, राष्ट्रीय महामार्गाच्या दोन्ही बाजूचे पाण्याचे नैसर्गिक प्रवाह पुर्ववत करणे, अनधिकृत पोचमार्ग हटविणे, धोक्याच्या ठिकाणी सुरक्षा बाबतचे बॅनर लावणे इत्यादी कामे करण्यात येणार आहेत.