'महाराष्ट्राची हास्यजत्रा' फेम गौरव मोरेचा ऑक्टोबरमध्ये जलवा; 'या' चित्रपटांमध्ये झळकणार

‘महाराष्ट्राची हास्यजत्रा’ फेम गौरव मोरेनं आपल्या विनोदीशैलीमुळे प्रेक्षकांच्या मनात एक वेगळं स्थान निर्माण केलं आहे. ‘आय एम ए गौरव मोरे फ्रॉम पवई फिल्टरपाडा’ हा गौरवचा डायलॉग संपूर्ण महाराष्ट्रात प्रसिद्ध झाला आहे. तसेच फिल्टरपाड्याचा बच्चन अशी गौरवची दुसरी ओळख आहे. असा हा लोकप्रिय गौरव लवकरच नवनवीन चित्रपटातून प्रेक्षकांच्या भेटीस येणार आहे. गौरव फक्त मराठी नाही तर हिंदी चित्रपटातही झळकणार आहे. 'सांगी' असं त्याच्या हिंदी चित्रपटाच नाव असून या चित्रपटात तो बॉलिवूडमधला लोकप्रिय अभिनेता शरिब हाशमीबरोबर काम करताना दिसणार आहे. गौरवची वर्णी प्रसाद ओकच्या आगामी चित्रपटातही लागली आहे. प्रसाद ओकच्या ‘परिनिर्वाण’ चित्रपटात गौरव पाहायला मिळणार आहे. पण गौरवसाठी येणारा ऑक्टोबर महिना खास असणार आहे. कारण या महिन्यात गौरवचे तीन चित्रपट प्रेक्षकांच्या भेटीस येणार आहे. ऑक्टोबर महिन्याच्या सुरुवातीला म्हणजेच ६ ऑक्टोबरला गौरवचा 'अंकुश' चित्रपट प्रदर्शित होणार आहे. या चित्रपटात गौरव मंग्या हा भूमिकेत पाहायला मिळणार आहे. 'अंकुश' चित्रपटानंतर गौरवचा 'बॉईज 4' चित्रपट २० ऑक्टोबरला प्रदर्शित होणार आहे. या चित्रपटाची नुकतीच घोषणा झाली. ऑक्टोबर महिन्याच्या अखेरिस गौरवचा 'लंडन मिसळ' चित्रपट प्रेक्षकांच्या भेटीस येणार आहे. २७ ऑक्टोबरला हा चित्रपट प्रदर्शित होणार आहे.