राहुल मोटे राष्ट्रवादीत आले आणि स्थगिती उठली

धाराशिव जिल्ह्यात राष्ट्रवादी कॉग्रेस अजित पवार गटाचा एकही आमदार नाही. जिल्ह्यात आमदार नसल्यामुळे निधीबाबतच्या गोंधळात अजित पवार यांनी फारसे लक्ष घातले नव्हते. पालकमंत्री प्रताप सरनाईक यांनी लेखी पत्र लिहून मुख्यमंत्र्यांकडे निधीची स्थिगिती उठविण्यासाठी प्रयत्न केले. या अनुषंगाने मुख्यमंत्री देवेंद्र फडणवीस, उपमुख्यमंत्री अजित पवार, एकनाथ शिंदे आणि पालकमंत्री प्रताप सरनाईक यांची बैठक झाली. या बैठकीत कोणत्या पक्षाच्या कार्यकर्त्यांना किती निधी द्यायचा याचे सूत्र ठरल्याचे असल्याचे अजित पवार यांनी सांगितले. ते म्हणाले, सध्या या जिल्ह्यात राष्ट्रवादीचा काेणी आमदार नसला तरी तेथील कार्यकर्त्यांना अडचण येणार नाही, याची काळजी घेण्यासाठी म्हणून निधी मंजूर केला आहे. विकास कामांसाठीचा हा निधी कोणत्या पक्षाला किती द्यायचा, याचे सूत्र आता ठरले आहे. धाराशिव जिल्ह्यात फार निधी मिळणार नाही. पण अडचण येणार नाही, याची काळजी घेऊ, असे पवार म्हणाले.

राहुल मोटे यांना प्रवेश देताना जिल्हा वार्षिक निधीचा मुद्दा पुन्हा चर्चेत आला आहे. या मतदारसंघातील साखर कारखाना तसेच अन्य अनेक विकासकामांसाठी मंत्रालयात कोणास भेटायचे असा प्रश्न राहुल मोटे यांच्यासमोर उभा ठाकला होता. त्यामुळे त्यांनी पक्ष बदलण्याचा निर्णय घेतल्याचा दावा त्यांचे कार्यकर्ते करतात. परंडा मतदारसंघाचे आमदार तानाजी सावंत हे मतदारसंघात फिरकत नसल्याने राहुल मोटे यांच्याकडे तालुक्यातील समस्या घेऊन येणाऱ्यांची संख्या वाढली आहे. सत्तेमधील काेणत्या नेत्याकडे शब्द टाकायचा, असा प्रश्न निर्माण झाल्याने राहुल मोटे यांनी अजित पवार यांचे नेतृत्व स्वीकारले. त्यांनी प्रवेश घेतल्यानंतर गेल्या वर्षीच्या निधीची स्थगिती उठविण्यात आली आहे. शिवसेना, भाजप आणि राष्ट्रवादीतील निधी वाटपाचे सूत्रही आता ठरले असल्याचे जाहीरपणे सांगत अजित पवार यांनी धाराशिव जिल्ह्यात पक्ष विस्तारास गती देण्याचे संकेत दिले आहेत.