scorecardresearch

महेश लांडगे : क्रीडाप्रेमी आमदार

राजकारणात अलीकडे घराणेशाहीची चर्चा पुन्हा जोर धरताना दिसते. हा मुद्दा योग्यच. पण तरीही असे अनेक राजकारणी आपल्या आसपास आहेत की ज्यांना कसलीही पार्श्वभूमी नाही. या अशा काही तरूण, आश्वासक पहिल्या पिढीच्या सर्व पक्षीय राजकारण्यांचा परिचय करून देणारी ही विशेष मालिका.

महेश लांडगे : क्रीडाप्रेमी आमदार
महेश लांडगे : क्रीडाप्रेमी आमदार

बाळासाहेब जवळकर

पिंपरी-मैदानी खेळांची आवड असणारा, कोणत्याही क्रीडाप्रकारांतील खेळाडू असो, त्यांच्यावर मनापासून प्रेम करणारा, शक्य होईल तितकी खेळाडूंना मदत करणारा क्रीडाप्रेमी, अशी भोसरीचे पैलवान आमदार महेश लांडगे यांचीओळख. ‘महेशदादा स्पोर्ट्स फाऊंडेशन’च्या माध्यमातून त्यांनी राज्यभरातील अनेक गरजवंतांना वेळोवेळी मदत केली आहे. ‘इंद्रायणीथडी जत्रा’सारखे अनेक भव्यदिव्य, अराजकीय उपक्रमही त्यांनी राबवले आहेत. महेश लांडगे शेतकरी कुटुंबातील असून पदवीधर आहेत. कबड्डी, कुस्तीप्रमाणेच बैलगाडा शर्यतींची त्यांना आवड आहे. विद्यार्थीदशेत असताना एन. एस. यू. आय.च्या माध्यमातून ते राजकारणात सक्रिय झाले. पुढे पिंपरी काँग्रेसचे शहराध्यक्षपद भूषवले. २००२ च्या महापालिका निवडणुकीत त्यांनी काँग्रेसकडूनच पहिली निवडणूक लढवली. तेव्हा ते विलास लांडे यांच्याकडून पराभूत झाले. २००४ मध्ये लांडे ‘हवेली’ विधानसभेचे आमदार म्हणून निवडून आले. तेव्हा त्यांनी स्वत:च्या नगरसेवकपदाचा राजीनामा दिला. या रिक्त जागेवर पोटनिवडणूक झाली. त्यावेळी महेश लांडगे नगरसेवक म्हणून निवडून आले, मात्र तेव्हा ते राष्ट्रवादीकडून लढले होते. नगरसेवकपदापासून सुरू झालेला लांडगे यांचा राजकीय प्रवास अव्याहतपणे सुरू आहे.

हेही वाचा… तेजस्वी बारब्दे : ग्रामविकासाचा ध्यास

पिंपरी पालिकेवर ते सलग तीन वेळा निवडून आले. २०१३-१४ मध्ये त्यांनी स्थायी समितीचे अध्यक्षपदही त्यांनी भूषवले. या काळात भोसरी परिसरातील गावांमध्ये केलेल्या विकासकामांच्या जोरावर २०१४ च्या विधानसभा निवडणुकीत त्यांनी राष्ट्रवादीकडे भोसरी विधानसभेसाठी उमेदवारी मागितली, मात्र तेव्हाही विलास लांडे यांनाच उमेदवारी मिळाली. तत्कालीन परिस्थितीत लांडगे यांचे तरूण वर्गात आकर्षण होते. त्यामुळेच मोदी लाटेचे वातावरण असतानाही ते अपक्ष निवडून आले. लांडे यांच्यासह दिग्गज नेत्यांचा त्यांनी पराभव केला. त्यानंतर लांडगे यांनी समर्थकांसह भाजपमध्ये प्रवेश केला.

हेही वाचा… श्रद्धा ठाकूर : कुशल संघटक

पिंपरी पालिकेच्या २०१७ मध्ये निवडणुका झाल्या, तेव्हा लांडगे यांचा करिश्मा पुन्हा दिसून आला. त्यांच्या भोसरी विधानसभा क्षेत्रातील जवळपास ४० जागांवर भाजपचे नगरसेवक निवडून आले. या पट्टयातून शिवसेनेला खातेही उघडता आले नाही. आतापर्यंत राष्ट्रवादी काँग्रेसच्या ताब्यात असलेल्या पिंपरी पालिकेची सत्ता भाजपकडे आली, त्याचे श्रेय भाजपचे चिंचवडचे आमदार लक्ष्मण जगताप यांच्याइतकेच आमदार महेश लांडगे यांनाही जाते. पालिकेच्या माध्यमातून भोसरीत झालेली भरीव कामे आणि पाच वर्षांत मतदारसंघावरच लक्ष केंद्रित केल्याने २०१९ च्या विधानसभा निवडणुकीत लांडगे पुन्हा विजयी झाले. यावेळी त्यांनी विलास लांडे यांचा ७५ हजार मतांच्या फरकाने पराभव केला. खेड, चाकण, आळंदी, मंचर आदी ठिकाणी त्यांनी उत्तम संघटनात्मक काम केले आहे. पिंपरी पालिकेच्या निवडणुका तोंडावर आहे. याही वेळी पालिकेवर भाजपचा झेंडा फडकवण्याचा भाजपचा निर्धार आहे. लांडगे यांच्याकडे भाजपचे शहराध्यक्षपद आहे. विरोधी पक्षनेते अजित पवार यांच्या बालेकिल्ल्यात राष्ट्रवादीशी दोन हात करायचे असल्याने लांडगे यांना मंत्रीपदाची ताकद गरजेची आहे, असा सूर भाजप वर्तुळात आहे.

मराठीतील सर्व सत्ताकारण ( Politics ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 26-11-2022 at 10:09 IST

संबंधित बातम्या