इन्स्टाग्रामवर पाठवलेले मेसेज न बघितल्याने चिडलेल्या तरुणाने महाविद्यालयीन तरुणीला अपहरणाची धमकी दिल्याची घटना समोर आली आहे. पुण्यातील निगडी परिसरात ही घटना घडली असून या प्रकरणी अज्ञात विरोधात निगडी पोलिसात गुन्हा दाखल करण्यात आला आहे. पोलिसांनी दिलेल्या माहितीनुसार, निगडी परिसरात राहणाऱ्या महाविद्यालयीन तरुणीने इन्स्टाग्रामवरील मेसेज न बघितल्याने चिडलेल्या तरुणाने संबंधित तरुणीला अपहरणाची धमकी दिली. हा प्रकार गेल्या महिनाभरापासून सुरू होता. तरुणी सुरुवातीला घाबरली होती. अखेर तिने धाडस दाखवत निगडी पोलिसात फिर्याद दिली आहे. अज्ञात आरोपीने तरुणीच्या इन्स्टाग्रामवर अकाऊंटवर 'तू माझ्याशी मैत्री करशील का?, मी तुला भेटायला आलोय.तुझा मोबाईल नंबर दे', अशा आशयाचे मेसेज केले होते. परंतु, तरुणीने याकडे लक्ष दिले नव्हते. याचाच राग मनात धरून आरोपी तरुणाने तरुणीचा त्रास द्यायला सुरुवात केली.'तू मेसेज बघितले नाहीस तर मी तुझे अपहरण करणार', अशी उघड धमकी त्याने दिली. याप्रकरणी निगडी पोलिसात गुन्हा दाखल करण्यात आला असून आरोपीचा शोध घेतला जात आहे.
