जेएनयू प्रकरणाचे पडसाद पुण्यातही उमटले. पंतप्रधान नरेंद्र मोदी आणि गृहमंत्री अमित शाह यांच्याविरोधात या ठिकाणी घोषणा देण्यात आली. पुणे विद्यापीठातील अनिकेत कॅन्टिनजवळ JNU मधील मारहाणीचा निषेध नोंदवत सुमारे दोन तास विद्यार्थ्यांनी ठिय्या आंदोलन केलं. या आंदोलनात राज्यमंत्री विश्वजीत कदम आणि विद्यापीठातील विविध संघटना सहभागी झाल्या. नरेंद्र मोदी आणि अमित शाह यांच्या विरोधात विद्यार्थी जोरदार घोषणाबाजी करण्यात आली. दिल्लीतील जवाहरलाल नेहरु विद्यापीठ (JNU ) संकुलात रविवारी झालेल्या हिंसक आंदोलनात रविवारी काही विद्यार्थी जखमी झाले. जेएनयूची अध्यक्ष आइशी घोषने या प्रकरणी तातडीने चौकशी सुरु करण्याची मागणी केली. तसेच आमच्यावर झालेला हल्ला पूर्वनियोजित होता असाही आरोप केला. मी स्वतः पोलिसांना फोन केला होता. पोलिसांनी हे आश्वस्त केलं होतं की कोणताही अनुचित प्रकार घडणार नाही. तरीही ७० च्या आसपास लोक इथे आले आणि त्यांनी आम्हाला रॉडने मारण्यास सुरुवात केली. दरम्यान याच सगळ्या घटनेचे पडसाद मुंबई आणि पुण्यातही उमटले.
