पुणे: ७० वर्षीय आजी आलिशान मोटारीतून विकतात भाजी, सर्व स्तरातून होतंय कौतुक

पिंपरी-चिंचवड शहरातील सांगवी, हिंजवडी या परिसरात सुमन भरणे लाखो रुपयांच्या इनोव्हा मोटारीतून भाजी विकतात. सुमन भरणे या शेतकरी कुटुंबातील असून गेल्या ३० वर्षांपासून भाजी विक्रीचा व्यवसाय करतात. त्या काही वर्ष टेम्पोमध्ये भाजी विकत होत्या. मात्र, टेम्पो मोठा असल्याने रस्त्यावर पार्क करण्यासाठी जागा मोठी लागत होती. त्यामुळे तीन वर्षांपूर्वी त्यांनी आलिशान मोटार विकत घेतली आणि मोटारीतच भाजी विकण्याचा व्यवसाय थाटला. यामुळे ग्राहकदेखील वाढले असल्याचं सुमन भरणे सांगतात. रोज त्यांचा जवळपास पाच हजारांचा व्यवसाय होतो. तर शनिवारी आणि रविवारी दहा हजार रुपयांचा व्यवसाय होतो असं त्या आवर्जून सांगतात.

सुमन आजी या पहाटे सकाळी उठवल्यानंतर घरातील काही कामं आवरतात. यानंतर घराच्या पाठीमागे असणाऱ्या शेतात जाऊन सुनांसह भाजी काढतात. त्यानंतर भाजी स्वच्छ धुवून घेतात. सायंकाळच्या सुमारास आलिशान इनोव्हामध्ये भाजी घेऊन आयटी हब असणाऱ्या हिंजवडी, पाषाण, औंध, सांगवी अशा ठिकाणी विकतात. त्यांच्या शेतात बटाटा, कांदा, पालक, मुळा, मेथी, कोथिंबीर अशा वेगवेगळ्या भाज्या पिकवल्या जातात.

दरम्यान, शेतकरी असल्याचा अभिमान आहे असं त्यांचा मुलगा संदिप भरणे सांगतो. सुमन भरणे अनेकदा आजारी पडल्या होत्या. मात्र तरीही त्या कधीच घरी बसल्या नाहीत. या वयातही त्यांचा उत्साह दांडगा असून त्यांच्यापासून अनेकांना प्रेरणा मिळेल अशी अपेक्षा आहे.