पुणे : बेशिस्त वाहनचालकांवर कारवाई करण्यासाठी वाहतूक पोलिसांनी कृत्रिम बु्द्धीमत्ता तंत्रज्ञानावर आधारित (एआय) कॅमेरे बसविलेल्या वाहनांचा वापर करण्यास सुरवातकेली आहे. एआय कॅमेरे असलेले वाहन शहरातील जंगली महाराज रस्ता आणि फर्ग्युसन रस्त्यावर गस्त घालून बेशिस्त वाहनचालकांवर कारवाई करणार असून, वाहतूक नियमभंगाची दंडात्मक ऑनलाइन पावती (ई-चलन) वाहनचालकांना त्वरीत मोबाइल संदेशाद्वारे मिळणार आहे.
‘प्रुफ ऑफ कन्सेप्ट’ (पीओसी) या प्रायोगिक प्रकल्पाअंतर्गत एआय कॅमेरे बसविलेली पोलिसांचे वाहन शहरातील वेगवेगळ्या भागात गस्त घालणार आहे. या योजनेचा प्रारंभ मंगळवारी करण्यात आला. पोलीस आयुक्त अमितेशकुमार, सहआयुक्त रंजनकुमार शर्मा, अतिरिक्त आयुक्त मनोज पाटील, पोलीस उपायुक्त हिंमत जाधव, सहायक आयुक्त नंदािनी वाग्याणी-पराजे या वेळी उपस्थित होते. ‘एआय’ कॅमेऱ्यांद्वारे बेशिस्त वाहनचालकांविरुद्ध फर्ग्युसन रस्त्यावर कारवाई करण्यास सुरुवात झाली आहे. गेल्या तीन महिन्यात फर्ग्युसन रस्त्यावर वाहतूक नियमभंग करणाऱ्या तीन हजार ९४९ वाहनचालकांवर कारावई करण्यात आली आहे.
प्रायोगिक तत्वावर एआय कॅमेरे बसविलेले एक वाहन जंगली महाराज रस्ता, फर्ग्युसन रस्त्यावर गस्त घालणार आहे. या वाहनांवरील कॅमेरे बेशिस्त वाहनचालकांना टिपून त्यांच्यावर कारवाई करणार आहेत. वाहतूक नियमभंग केल्यानंतर त्वरीत दंडात्मक कारवाईचा संदेश वाहनचालकांना मोबाइलवर मिळणार आहे.
कॅमेरे असलेल्या वाहनांची संख्या वाढविणार
प्रायोगिक तत्त्वावर सध्या जंगली महाराज आणि फर्ग्युसन रस्त्यावर एआय कॅमेरे बसविलेले वाहन गस्त घालणार आहे. त्यानंतर अशा प्रकारच्या वाहनांची संख्या वाढविण्यात येणार आहे. बेशिस्तांवर कारवाई, तसेच वाहतुकीला शिस्त लागण्यास मदत होणार आहे, असे अतिरिक्त पोलीस आयुक्त मनोज पाटील यांनी सांगितले. या कॅमेऱ्यांमुळे रस्त्यावरचे वादविवाद कमी होतील, तसेच कारवाईही प्रभावी होईल.
