वारजे भागात खासगी बसच्या धडकेने दुचाकीस्वाराचा मृत्यू झाल्याची घटना घडली. गजेंद्र श्रीधर घोळवे (वय ३८, रा. श्री शारदा निवास,आय.आय.टी रस्ता, खडकवासला) असे मृत्युमुखी पडलेल्या दुचाकीस्वाराचे नाव आहे. या प्रकरणी खासगी बसचालकाच्या विरोधात गुन्हा दाखल करण्यात आला आहे. घोळवे यांचे भाऊ राजेंद्र (वय ३६, रा. आंबेगाव खुर्द) यांनी वारजे पोलीस ठाण्यात फिर्याद दिली आहे. दुचाकीस्वार गजेंद्र घोळवे रात्री दहाच्या सुमारास वारजे परिसरातून जात होते. त्या वेळी हाॅटेल पुणेरीसमोर भरधाव खासगी बसने दुचाकीस्वार घोळवे यांना धडक दिली. अपघातात गंभीर जखमी झालेल्या घोळवे यांचा मृत्यू झाला.अपघातानंतर पसार झालेल्या बसचालकाच्या विरोधात गुन्हा दाखल करण्यात आला असून पोलीस उपनिरीक्षक जवळगी तपास करत आहेत.