आरोग्यावरील पुस्तके पुण्यात ‘बेस्टसेलर’!

आरोग्यावर लेखन करणारे लेखक आणि या प्रकारच्या पुस्तकांचे प्रकाशक यांच्या संख्येत गेल्या दहा वर्षांत शहरात प्रचंड वाढ झाली असून आरोग्यावरील पुस्तके खरेदी करण्यातही चोखंदळ पुणेकरच राज्यात आघाडीवर असल्याचे दिसून आले आहे. सध्या वजन घटवणे आणि गर्भसंस्कार या विषयांवरील पुस्तकांबरोबरच चक्क जुन्या आयुर्वेदिक ग्रंथांनाही शहरात वाढती मागणी असल्याचे निरीक्षण काही पुस्तकविक्रेत्यांनी नोंदवले आहे.
 ‘अक्षरधारा बुक गॅलरी’चे रमेश राठिवडेकर म्हणाले, ‘‘पुण्यात भरवलेल्या पुस्तकांच्या प्रदर्शनांमध्ये आरोग्यावरील पुस्तकांची होणारी विक्री राज्यात इतर ठिकाणी होणाऱ्या विक्रीपेक्षा अधिक असल्याचा आमचा अनुभव आहे. आरोग्यावर लिहिणारे लेखक आणि प्रकाशकही पुण्यातच सर्वाधिक आहेत. ग्राहकाने खरेदी केलेल्या एकूण पुस्तकांपैकी साधारणपणे ३० टक्के खर्च आरोग्यावरील पुस्तकांचा असतो. सध्या बाजारात वजन घटवणे आणि गर्भसंस्कार या दोन विषयांवरील पुस्तकांची संख्या उदंड आहे. त्याखालोखाल दररोज किती कॅलरी असलेला आहार घ्यावा, अशा पद्धतीची आहारासंबंधीची आकडेवारी देणाऱ्या पुस्तकांची चलती आहे.’’  
पूर्वी एकाच पुस्तकात अनेक आजारांविषयी संक्षिप्त माहिती देणाऱ्या पुस्तकांची चलती होती. आरोग्यावरील पुस्तकांच्या सध्याच्या बाजारपेठेवर नजर टाकता या पुस्तकांची जागा ‘एक आजार एक पुस्तक’ या प्रकारच्या पुस्तिकांनी घेतली आहे. पाठदुखी, कंबरदुखी, गुडघेदुखी, पोटाचे विकार, रक्तदाब, मधुमेह, आम्लपित्त या विषयांवरील पुस्तिका बाजारात प्रामुख्याने दिसत आहेत. ‘पॉकेट बुक’ प्रकारच्या या पुस्तिका आकाराने लहान, हलक्या असून त्यांची किंमतही कमी असल्याने त्यांना चांगली मागणी आहे.  ‘रोहन प्रकाशन’चे प्रदीप चंपानेरकर म्हणाले, ‘‘पाठदुखी आणि संगणकाच्या अति वापरामुळे शरीरावर होणारे दुष्परिणाम या विषयावरील पुस्तकांना पुण्यात विशेष प्रतिसाद मिळतो. डॉक्टरांकडे गेल्यानंतरही रुग्णांच्या मनात राहून जाणाऱ्या शंकांवर आधारित प्रश्नोत्तरांच्या स्वरूपातील पॉकेट बुक्स आम्ही बाजारात आणली असून त्यांचाही खप चांगला आहे.’’