“रिकामटेकड्या लोकांना…”, महात्मा फुलेंबाबत केलेल्या विधानावर चित्रा वाघ यांची प्रतिक्रिया

संबंधित टीकेबाबत विचारलं असता चित्रा वाघ म्हणाल्या की, रिकामटेकड्या लोकांना काय वादच लागतात. त्यांना काही काम आहे का? मी एवढंच म्हटले की, महिलांना पुरुषांनी ओवाळले, तर ते तुम्हाला नको आहे का? ती चांगली गोष्ट आहे ना, चंद्रकांत दादांनी भाषणात सांगितले की, आम्हाला प्रत्येक वेळी बहिणी ओवाळतात.आमचं अभिष्टचिंतन करतात. आमच्यासाठी यश मागतात. त्यामुळे बंधूंनीही बहिणींसाठी यश मागितलं तर ते कुठे वाईट आहे. माझ्या आजवरच्या कारकीर्दमध्ये पहिल्यांदाच मला पाच पुरुषांनी ओवाळलं आहे. हे दादामुळे झालं असून मी त्यांची ज्योतिबा फुलेंशी तुलना केली नाही.

त्यांनी जी वाट दाखवली आहे. त्या वसा आणि वारसा यावर चालणारी ही लोक आहेत. महात्मा ज्योतिबा फुले यांनी काय केल? तर त्यांनी सावित्रीबाई फुले यांना पुढे केले. त्यामुळे महिलांना जर ज्योतिबाकडून म्हणजेच पुरुषांकडून ओवाळलं जात असेल तर त्यामध्ये वाईट काय आहे. त्यामध्ये वाईट असण्याच कारण समजत नाही. दोघेजण रिकामटेकडे बसलेले आहेतच एक इथे आणि एक तिकडे रिकामटेकडे उठले की आपलं चपर चपर चालूच अशा शब्दात त्यांनी विरोधकांना सुनावले.

तसेच त्या पुढे म्हणाल्या की, मी चंद्रकांत पाटलांची ज्योतिबा फुलेंशी तुलना केली नाही. मी त्यांच्या पक्षात (राष्ट्रवादी काँग्रेसमध्ये) असताना प्रत्येक कार्यक्रमात ते वाक्य वापरलं आहे.त्यावेळी कोणीही त्या शब्दावर आक्षेप घेतला नाही. अशी आठवण करून देत त्यांनी राष्ट्रवादीवर निशाणा साधला.