पुणे : विधानसभा निवडणुकीसाठी दाखल केलेल्या प्रतिज्ञापत्रातील तफावतींबाबत शिवसेनेचे बंडखोर मंत्री एकनाथ शिंदे यांच्या विरोधात मंगळवारी शिवाजीनगर न्यायालयात खासगी तक्रार दाखल करण्यात आली. शिवाजीनगर न्यायालयातील अतिरिक्त मुख्य न्यायदंडाधिकारी यांच्याकडे अभिजित खेडकर व डॉ. अभिषेक हरिदास यांनी ॲड. समीर शेख यांच्या मार्फत तक्रार दाखल केली आहे. प्राथमिक सुनावणीनंतर ही तक्रार ठाणे येथील न्यायालयात वर्ग करण्यात येईल. शिंदे यांनी २००९, २०१४ आणि २०१९ मध्ये कोपरी-पाचपाखाडी विधानसभा मतदारसंघातून निवडणूक लढविली होती. त्या वेळी त्यांनी उमेदवारी अर्ज दाखल करताना प्रतिज्ञापत्र सादर केले होते. प्रतिज्ञापत्रात त्यांच्या शिक्षणाच्या नोंदीसह मालमत्तेच्या तपशिलात तफावत असल्याचे तक्रारीत नमूद करण्यात आले आहे. भारतीय दंड विधान कलम ९९, २००, लोकप्रतिनिधी कायदा कलम १२५ अ अंतर्गत न्यायालयात तक्रार दाखल करण्यात आली आहे.
