पिंपरीत अशुद्ध पाण्याच्या तक्रारी; पाणी पिण्यायोग्य असल्याचा महापालिकेचा दावा

दरम्यान, जलवाहिनी आणि टाक्या स्वच्छ केल्या जातात. ज्या भागात गढूळ पाण्याच्या तक्रारी आहेत, तेथे तातडीने जलवाहिनी स्वच्छ केली जात असल्याचे पाणीपुरवठा विभागाकडून सांगण्यात आले.

असे होते शुद्धीकरण

महापालिका रावेत बंधाऱ्यावरून पाणी उचलते. ते पाणी निगडी प्राधिकरणातील जलशुद्धीकरण केंद्रात आणले जाते. तसेच आंद्रा धरणातील पाणी इंद्रायणी नदीवरील निघाेजे बंधाऱ्यावरून उचलून चिखलीतील जलशुद्धीकरण केंद्रात आणले जाते. या पाण्यावर जागतिक आरोग्य संघटनेच्या (डब्ल्यूएचओ) मानकांप्रमाणे शुद्धीकरणाची प्रक्रिया केली जाते. शुद्ध केलेले पाणी शहरातील विविध जलकुंभांमध्ये सोडले जाते. त्यातून जलवाहिनीद्वारे नागरिकांना पाणी वितरित केले जाते.

पाणी उकळून पिण्याचे आवाहन

पावसाळ्याच्या सुरुवातीला पाणी काही प्रमाणात गढूळ असते. त्यामुळे नागरिकांनी पाणी उकळून वापरावे. ज्या भागात गढूळ पाण्याची तक्रार येत आहे, अशा भागांत विशेष लक्ष दिले जात आहे. पाण्यावर सर्व प्रक्रिया करूनच नागरिकांना त्याचे वितरण केले जाते. त्यामुळे नागरिकांनी घाबरून जावू नये, असे आवाहन महापालिकेने केले आहे.

गेल्या काही दिवसांपासून संपूर्ण शहरात अशुद्ध पाणीपुरवठा होत आहे. यामुळे विविध आजार हाेण्याची नागरिकांना भीती आहे. प्रशासनाने उपाययोजना करून सुरळीत पाणीपुरवठा करावा.– उषा मुंडे,माजी नगरसेविका

स्वच्छ आणि शुद्ध पाणीपुरवठा करण्यासाठी प्रयत्न सुरू आहेत. पाण्यावर ‘डब्ल्यूएचओ’च्या मानकांप्रमाणे शुद्धीकरणाची प्रक्रिया केली जात आहे. ज्या भागात गढूळ पाणी येत आहे, तेथील नागरिकांनी स्थानिक पाणीपुरवठा कार्यालय, नियंत्रण कक्षात तक्रार नोंदवावी. तत्काळ उपाययाेजना केली जाईल.-अजय सूर्यवंशी, सह शहर अभियंता, पाणीपुरवठा विभाग, पिंपरी-चिंचवड महापालिका