उद्धव-राज यांना एकत्र आणणारा पूल बांधतोय- नितीन गडकरी

शिवसेना अध्यक्ष उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे एकत्र आले तरच शिवसेनाप्रमुख बाळासाहेब ठाकरे यांचे शिवशाहीचे स्वप्न साकार होऊ शकेल. मी दोघांचाही विश्वासपात्र मित्र आहे. आजवर इतके पूल बांधले आहेत. उद्धव आणि राज यांना एकत्र आणण्याचा पूल बांधणे कठीण आहे. पण, मी हा पूल बांधण्याचा प्रयत्न करतोय, असे भाजपचे माजी राष्ट्रीय अध्यक्ष नितीन गडकरी यांनी शुक्रवारी सांगितले.
डी. एस. कुलकर्णी फाउंडेशनतर्फे आयोजित ‘डीएसके गप्पा’अंतर्गत सुधीर गाडगीळ आणि ‘झी २४ तास’ चे संपादक उदय निरगुडकर यांनी नितीन गडकरी यांची मुलाखत घेतली. मी दिल्लीमध्ये खूष असून राज्यामध्ये परतण्याचा कोणताही विचार नसल्याचे त्यांनी सांगितले. देवेंद्र फडणवीस, एकनाथ खडसे, विनोद तावडे आणि गोपीनाथ मुंडे हेच पक्षाचे राज्यातील नेते आहेत, असेही ते म्हणाले.
राज्यामध्ये काँग्रेस-राष्ट्रवादी आघाडीला ३३ टक्के तर भाजप-शिवसेना युतीला २७ टक्के मते मिळतात. केवळ ३३ टक्के मतांच्या जोरावर काँग्रेस आघाडी गेली दहा वर्षे सत्तेमध्ये आहे. त्यामुळे काँग्रेसविरोधातील सर्व पक्षांना एकत्र करण्याचा प्रयत्न करण्याचे मत प्रदेशाध्यक्ष देवेंद्र फडणवीस यांनी व्यक्त केले आहे. बाळासाहेब ठाकरे यांच्याशी माझे चांगले संबंध होते. उद्धव आणि राज यांच्याशी माझे चांगले संबंध आहेत. त्यामुळे या दोघांना एकत्र आणले तर काँग्रेसला सत्तेवरून हटविणे सोपे आहे. तेच काम मी करणार आहे, असे नितीन गडकरी यांनी सांगितले.
राज्यकर्ता विकासाभिमुख, संवेदनशील आणि प्रखर इच्छाशक्तीचा असेल तरच चांगली कामे होऊ शकतात, हे मी मंत्री असताना सिद्ध केले आहे, असे सांगून गडकरी म्हणाले, राजकारणातील कर्तृत्व, नेतृत्व आणि वक्तृत्व यापेक्षाही मानवी संबंध चांगले ठेवणे याला महत्त्व आहे. हे लोकशाहीच्या प्रगल्भतेचे लक्षण आहे. पक्षातील फूट आणि मतविभाजनाचा फटका बसल्याने कर्नाटकमध्ये चांगले सरकार देऊनही भाजपचा पराभव झाला. मात्र, भाजपने सीमावासियांवर अन्याय केला या आरोपामध्ये तथ्य नाही. सीमा प्रश्न खूप वर्षांपासूनचा जुना आणि न्यायप्रवीष्ट आहे. केंद्रात, राज्यात आणि कर्नाटकमध्ये अनेक वर्षे सत्तेमध्ये असलेल्या काँग्रेसलाही हा प्रश्न सोडवता आलेला नाही.

गडकरी गटच अस्तित्वात नाही
पुण्यातील बातम्यांमध्ये गडकरी गट असे छापून येते. पण, गडकरी गटच अस्तित्वात नसल्याचा दावा खुद्द नितीन गडकरी यांनी केला. ते म्हणाले, पुण्यातील एकही नियुक्ती मी केलेली नाही. कुणालाही तिकीट दिलेले नाही. मग कसला आलाय गडकरी गट. मी जे निर्णय घेतले ते पक्षहितासाठीच. त्यासाठी मला कोणाच्याही पाठिंब्याची गरज नाही.