पुणे: फोर्ब्स मार्शल समूहाचे संस्थापक दरायस एम. फोर्ब्स यांचे शुक्रवारी निधन झाले. ते ९७ वर्षांचे होते. सेंटर फॉर अॅडव्हान्समेंट ऑफ फिलॉन्थॉफ्री (सीएपी) या संस्थेचे ते संस्थापक सदस्य होते.
फोर्ब्स यांचा जन्म १९२६ मध्ये झाला. त्यांनी वयाच्या १९ व्या वर्षी जे.एन.मार्शल या कंपनीत काम सुरू केले. तिथून त्यांनी स्वत:चा व्यवसाय सुरू करीत ब्रिटीश कंपन्यांशी भागीदारी केली. त्यांनी नंतर पुण्यात स्वत:चा कारखाना सुरू केला. त्यानंतर त्यांच्या व्यवसायाचा विस्तार उत्तरोत्तर वाढत गेला. फोर्ब्स यांच्या मागे फरहाद आणि नौशाद ही दोन मुले आहेत.
आणखी वाचा-काळजी घ्या! डोळ्यांच्या साथीचे तीन लाखांहून अधिक रुग्ण
फोर्ब्स यांनी सेंटर फॉर अॅडव्हान्समेंट ऑफ फिलॉन्थॉफ्री या संस्थेच्या स्थापनेत मोलाची भूमिका बजावली. फोर्ब्स यांना श्रद्धांजली वाहताना नोशिर एम. दादरावाला म्हणाले की, फोर्ब्स यांनी या संस्थेला आकार दिला. याचबरोबर त्यांनी मुंबईतील त्यांच्या कंपनीच्या कार्यालयात संस्थेला जागा दिली. ते अतिशय विचारी आणि इतरांना प्रोत्साहन देणारे व्यक्ती होते. त्यांना सामाजिक दायित्वाबद्दल चर्चा करण्यापेक्षा ते कृतीतून दाखविण्यावर भर दिला. नंतरच्या काळात त्यांचे अनुकरण इतर कंपन्यांनी केले.
