पुणे महानगर प्रदेश विकास प्राधिकरणाला (पीएमआरडीए) शहरातील चांदणी चौक ते जांभूळवाडी आणि जैन वसतिगृह बकोरी फाटा ते बकोरी या दोन्ही रस्त्यांच्या कामांचा सविस्तर प्रकल्प अहवाल (डिटेल प्रोजेक्ट रिपोर्ट- डीपीआर) तयार करण्याची सूचना करण्यात आली आहे. या दोन्ही रस्त्यांच्या भूसंपादनासाठी जमीनधारकांबरोबर येत्या काही दिवसांमध्ये बैठक घेण्यात येणार आहे.
चांदणी चौक ते जांभूळवाडी, जैन वसतिगृह बकोरी फाटा ते बकोरी रस्ता, वाघोली ते केसनंद, वाघोली ते आव्हाळवाडी या रस्त्यांच्या कामासंदर्भात उपमुख्यमंत्री, जिल्ह्याचे पालकमंत्री अजित पवार यांच्या अध्यक्षतेखाली बैठक झाली. त्यावेळी महिन्याभरात डीपीआर करण्याची सूचना पवार यांनी पीएमआरडीएला केली.
वित्त विभागाचे अपर मुख्य सचिव ओ. पी. गुप्ता, नियोजन विभागाचे प्रधान सचिव सौरभ विजय, उपमुख्यमंत्र्यांचे सचिव डाॅ. राजेश देशमुख, सहसचिव विकास ढाकणे, राष्ट्रीय महामार्ग प्राधिकरणाचे प्रकल्प संचालक संजय कदम यावेळी उपस्थित होते. तर जिल्हाधिकारी जितेंद्र डुडी, पीएमआरडीएचे महानगर आयुक्त डाॅ. योगेश म्हसे, पुणे महापालिका आयुक्त नवल किशोर राम, शिरूरचे आमदार माऊल कटके दूरदृश्य संवाद प्रणालीद्वारे बैठकीस उपस्थित होते.
वाढत्या नागरीकरणामुळे शहरातील वाहतुकीवर मोठा ताण येत आहे. त्यामुळे अनेक ठिकाणी वाहतूक कोंडी होत असल्याने सर्व यंत्रणांनी समन्वयाने काम करावे, असेही पवार यांनी स्पष्ट केले. वाघोली ते केसनंद आणि वाघोली ते आव्हाळवाडी हा रस्ता सार्वजनिक बांधकाम विभागाच्या अंतर्गत येत आहे. मात्र नागरिकांची होणारी गैरसोय लक्षात घेता पीएमआरडीएकडून हा रस्ता तातडीने करण्याचेही या बैठकीत निश्चित करण्यात आले.
