शिवसेनेच्या आंदोलनामुळे पालिकेची उलटा-पुलटा सभा रद्द

कचरा प्रश्नाकडे लक्ष वेधण्यासाठी शुक्रवारी शिवसेनेने महापालिका सभागृहाबाहेर जोरदार घोषणा देत आंदोलन केल्यामुळे सभागृहात आयोजित करण्यात आलेली उलटा-पुलटा ही सभा दहाच मिनिटांत संपवण्यात आली. शहरभर कचऱ्याचा प्रश्न निर्माण झालेला असताना गमतीच्या सभा कसल्या करता, अशी विचारणा करत शिवसैनिकांनी या वेळी सभागृहाचे रस्तेच बंद करून टाकले. महापालिका वर्धापनदिनानिमित्त या सभेचे आयोजन करण्यात आले होते.
महापालिकेचा वर्धापनदिन शनिवारी (१५ फेब्रुवारी) साजरा होत असून त्या निमित्त विविध कार्यक्रमांचे आयोजन शुक्रवारी करण्यात आले होते. त्या अंतर्गत नगरसेवक आणि अधिकारी यांची उलटा-पुलटा ही सभाही दुपारी तीन वाजता महापालिका सभागृहात आयोजिण्यात आली होती. या सभेत नगरसेवक अधिकाऱ्यांची आणि अधिकारी नगरसेवकांची भूमिका करणार होते. सभा सुरू झाल्यानंतर लगेचच सभागृहाबाहेर शिवसेनेचे आंदोलन सुरू झाले. पक्षाचे शहरप्रमुख श्याम देशपांडे तसेच गटनेता अशोक हरणावळ यांच्या नेतृत्वाखाली शिवसैनिकांनी जोरदार घोषणा सुरू केल्यामुळे सभेच्या कामकाजात चांगलाच व्यत्यय आला. त्यानंतर शिवसैनिकांनी सभागृहाचे मार्ग बंद करून टाकले. त्यामुळे नगरसेवकांना तसेच अधिकाऱ्यांना सभागृहात जाता आले नाही. शहरातील कचऱ्याच्या प्रश्नाकडे लक्ष देणे आवश्यक असताना अशा सभा कसल्या घेता अशी विचारणा करत या वेळी शिवसेनेच्या कार्यकर्त्यांनी या सभेचाही निषेध केला.
शहरात कचऱ्याची मोठी समस्या असताना लोकप्रतिनिधींना आणि अधिकाऱ्यांना मनोरंजाचे कार्यक्रम कसे सुचतात, अशी विचारणा आम्ही या वेळी केली. आधी हा प्रश्न सोडवा, तत्काळ कचरा हलवा, अशाही मागण्या या वेळी केल्याचे देशपांडे यांनी सांगितले. मुख्य दरवाजावर आंदोलन करत शिवसैनिकांनी कोणालाही आत जाऊ दिले नाही आणि ही उलटा-पुलटा सभा तहकूब करायला लावली.