राज्यातील करोनाग्रस्तांची संख्या दिवसागणिक वाढतच आहे. रविवारी सायंकाळपर्यंत राज्यातील करोग्रस्तांनी आठ हजारांची संख्या ओलांडली होती. दररोज वाढणाऱ्या रूग्णसंख्येमुळे हॉस्पिटल, डॉक्टर आणि प्रशासनावरील ताण वाढत आहे. या समस्येच्या अनुषंगाने पुणे येथील मुख्य वाहन कंपनी फोर्स मोटर्सने भारतीय जैन संघटना (बीजेएस, पुणे) यांच्या समवेत महाराष्ट्रात “डॉक्टर आपल्या दारी” उपक्रमामार्फत फिरत्या दवाखान्याची सुविधा उपलब्ध करून दिली आहे. एक एप्रिल रोजी या उपक्रमाची सुरूवात झाली. तेव्हापासून आजतागत याअंतर्गत तब्बल एक लाख ११ हजार रूग्णांची तपासणी करण्यात आली. २६ दिवसांमध्ये एक हजारापेक्षाही जास्त संशयित रूग्णांना सरकारी रूग्णालयात पाठण्यात आले.
यामध्ये डॉक्टर, मदतनीस, औषधांनी सुसज्ज वॅन्समध्ये 30 फिरत्या दवाखान्यांची सोय करण्यात आली आहे. पूर्व-सूचित वेळापत्रकानुसार हे फिरते दवाखाने आर्थिकदृष्ट्या कमकुवत भागांत जातात. या व्हॅनमध्ये डॉक्टर आणि वैद्यकीय मदतनीसांची संपूर्ण टीम सुसज्जित असून करोनाची लक्षणे रुग्णांमध्ये तपासण्यात येतात. ज्या रुग्णांमध्ये थेट संसर्ग आढळून येतो, त्यांना नियुक्त करण्यात आलेल्या रुग्णालयांत पाठवले जाते.
डॉक्टरांनी लिहून दिलेली किंवा उपलब्ध करून देण्यात येण्यात येणारी सर्व औषधे मोफत पुरवली जात आहेत. दरदिवशी मोबाईल युनिटसमध्ये २५०० लोकांची तपासणी करण्यात येते. व्हॅनमधील डॉक्टर रुग्णांची ताप आणि सर्दी-खोकल्याची तपासणी करतात आणि त्यांना कोरोना विषाणूचा प्रादुर्भाव रोखण्यासाठी आवश्यक असलेल्या प्रतिबंधात्मक उपाययोजनांचे अनुपालन करण्याविषयी सांगतात.
