पिंपरी-चिंचवडमध्ये पाच जणांच्या टोळक्याने एका होमगार्ड कर्मचाऱ्याला बेदम मारहाण केल्याची घटना घडली आहे. यात होमगार्ड सौरभ साळुंखे हे किरकोळ जखमी झाले आहेत. मारहाण करणाऱ्यांपैकी काही तरुणांनी मद्यपान केलं होतं, असं पोलिसांकडून सांगण्यात आलं आहे. याप्रकरणी सरकारी कामात अडथळा आणल्याप्रकरणी चिखली पोलीस ठाण्यात गुन्हा दाखल करण्यात आला आहे. दरम्यान, आरोपी फरार झाले आहेत.
पिंपरी-चिंचवड परिसरातील चिखली (घरकुल) येथे पाच जणांचं एक टोळकं एका दुकानाच्या समोर सिगारेट ओढत होते. तेव्हा तेथील महिलेने इथं थांबू नका असं म्हटल्यानंतर दुकानदार आणि या तरुणांमध्ये वाद सुरु झाला. यावेळी होमगार्ड सौरभ साळुंखे तिथून जात होते. त्यांनी हा वाद सोडवण्याचा प्रयत्न करताना हस्तक्षेप करीत विचारणा केली. तेव्हा या तरुणांनी त्यांना मारहाण करण्यास सुरुवात केली. यात सौरभ हे किरकोळ जखमी झाले आहेत.
दरम्यान, दुकानदार आणि इतर काही व्यक्तींनी त्यांच्यातील भांडण सोडवलं यावेळी तेथील काही लोकांनी या घटनेचे मोबाईलमध्ये व्हिडिओ चित्रिकरण केले. यावरुन सरकारी कामात अडथळा आणल्याप्रकरणी चिखली पोलीस ठाण्यात संबंधीत तरुणांवर गुन्हा दाखल करण्यात आला आहे, पोलीस उपनिरीक्षक सचिन उबाळे यांनी माहिती दिली.
