पुण्यात आज दिवसभरात नव्याने ६४३ रुग्ण आढळून आले. त्यामुळे शहरातील एकूण करोनाबाधितांची संख्या १ लाख ५० हजार ४३३ एवढी झाली आहे. तर आज दिवसभरात ३० रुग्णांचा मृत्यू झाला आहे. त्यामुळे आजअखेर ३ हजार ७०९ रुग्णांचा मृत्यू झाला आहे.
करोनावर उपचार घेणार्‍या १२७० रुग्णांची तब्येत ठणठणीत असल्याने, त्या सर्वांना घरी सोडण्यात आले आहे. त्यामुळे आज अखेर १ लाख ३२ हजार ५४० रुग्ण करोनामुक्त झाले आहेत, अशी माहिती पुणे महापालिकेच्या आरोग्य विभागानं दिली आहे.
तर, पिंपरी-चिंचवड शहरात आज दिवसभरात ५३३ करोनाबाधित रुग्ण आढळून आले, तर २३ जणांचा उपचारांदरम्यान मृत्यू झाला. तसेच आज ८८२ जण करोनामुक्त झाले आहेत. पिंपरी-चिंचवड शहरात एकूण करोनाबाधित रुग्णांची संख्या ८१ हजार ३७२ वर पोहचली असून यांपैकी ७५ हजार ३८६ जण करोनातून बरे झाले आहेत.
पिंपरी-चिंचवड महापालिकेच्या रुग्णालयात उपचार घेत असलेल्या सक्रिय रुग्णांची संख्या ३ हजार ५७ एवढी असल्याची माहिती महापालिकेच्या आरोग्य विभागाने दिली.
