पुणे : अनैतिक संबंधांना विरोध केल्याने जमीन खरेदी-विक्री करणाऱ्या व्यावसायिकाला बेदम मारहाण करून त्याचा खून करण्यात आल्याची घटना कात्रज भागातील गुजरवाडी परिसरात शुक्रवारी रात्री घडली. याप्रकरणी भारती विद्यापीठ पोलिसांनी पसार झालेल्या दोघांना अटक केली.
मनोहर दिनकर शिंदे (वय ४६, रा. पवारनगर, गुजरवाडी रस्ता, मांगडेवाडी, कात्रज) असे खून झालेल्याचे नाव आहे. याप्रकरणी रोहित ऊर्फ बुधाजी मारुती असोरे (वय ३२), केशव मोतीराम असोरे (वय २६, दोघे रा. खोपडेनगर, गुजरवाडी, कात्रज) यांना अटक करण्यात आली.पोलिसांनी दिलेल्या माहितीनुसार, मनोहर शिंदे यांच्या नात्यातील एका महिलेचे आरोपी रोहित याच्याशी अनैतिक संबंध होते. रोहित रिक्षा चालवायचा. त्यानंतर त्याने प्रवासी वाहने भाडेतत्त्वावर देण्याचा व्यवसाय सुरू केला. मनोहर यांनी अनैतिक संबंधांना विरोध केला होता. या कारणावरून मनोहर आणि रोहित यांच्यात यापूर्वी वाद झाला होता.
शुक्रवारी रात्री रोहित आणि त्याच्याबरोबर असलेले दोन ते तीन साथीदार कात्रज भागातील पवारनगर भागात आले. रोहित, केशव आणि साथीदारांनी शिंदे यांना लाथाबुक्क्यांनी बेदम मारहाण केली. त्यांच्या डोक्यात बांबूचा प्रहार केला. त्यात शिंदे यांच्या डोक्याला गंभीर दुखापत झाली. शिंदे यांना तातडीने खासगी रुग्णालयात दाखल करण्यात आले. मात्र, उपचारांपूर्वीच त्यांचा मृत्यू झाला होता.
या घटनेची माहिती मिळताच भारती विद्यापीठ पोलिसांनी घटनास्थळी धाव घेतली. पसार झालेला आरोपी रोहित याला ताब्यात घेण्यात आले. त्याचा साथीदार केशव याला बीडमधील गेवराई परिसरातून ताब्यात घेण्यात आले. वरिष्ठ पोलीस निरीक्षक सावळाराम साळगावकर तपास करत आहेत.
