PCMC Budget 2026-27: अर्थसंकल्पासाठी रस्ते, कचरा व्यवस्थापनाच्या कामांना प्राधान्य; नागरिकांनी सुचविली ५ हजार १०२ कामे

पिंपरी-चिंचवड महापालिकेने अर्थसंकल्पात नागरिकांचा सहभाग घेण्यास सुरुवात केली आहे. त्यासाठी अर्थसंकल्प तयार करण्यापूर्वी नागरिकांना कामे सुचविण्याचे आवाहन केले जाते. यंदा महापालिकेच्या ‘अर्थसंकल्पात नागरी सहभाग’ या उपक्रमाला चांगला प्रतिसाद मिळाला आहे. अर्थसंकल्प २०२६-२७ साठी पाच हजार १०२ नागरिकांनी कामे सुचविली आहेत. हे प्रमाण मागील वर्षीपेक्षा दुप्पट आहे. गेल्या वर्षी या उपक्रमांतर्गत दोन हजार २७९ नागरिकांचे अभिप्राय प्राप्त झाले होते.

यंदा १५ ऑगस्ट ते १५ सप्टेंबर २०२५ या कालावधीत हा उपक्रम राबविण्यात आला. शहरातील सर्व आठ प्रभागांमधील रहिवाशांचा त्याला उत्स्फूर्त प्रतिसाद मिळाला. यामध्ये ‘ड’ क्षेत्रीय कार्यालय हद्दीतून सर्वाधिक एक हजार १६१ नागरिकांनी कामे सुचविली आहेत. शेवटच्या तीन दिवसांत दोन हजार पेक्षा जास्त नागरिकांनी यामध्ये सहभाग नोंदवत कामे सुचविली. या उपक्रमांतर्गत नागरिकांनी सुचवलेल्या योजना, कामांसाठी त्यांच्या परिसरात वसूल होणाऱ्या मालमत्ता कराच्या दहा टक्के निधीची तरतूद केली जाते.

‘ड’ क्षेत्रीय कार्यालय हद्दीतून सर्वाधिक सूचना

महापालिकेच्या ‘ड’ क्षेत्रीय कार्यालय हद्दीतून सर्वाधिक म्हणजे एक हजार १६१ नागरिकांनी कामे सुचविली आहेत. ‘ह’ कार्यालयाच्या हद्दीतून सर्वांत कमी ४१४ जणांनी कामे सुचविली आहेत. ‘अ’ ६३५, ‘ब’ ७५५, ‘क’ ५७८, ‘ई’ ५७९, ‘ग’ ४८८ आणि ‘फ’ प्रभागातून ४९२ नागरिकांनी कामे सुचविली आहेत.

रस्त्यांच्या कामांना प्राधान्य

सर्वाधिक एक २६५ रस्त्याची कामे सुचविली आहे. घनकचरा व्यवस्थापनाची ५९८, पाणीपुरवठ्याची ४५८, उद्याने व खेळाची मैदानेबाबत ४०४, पावसाच्या पाण्याचा निचरा ३०७ आणि सार्वजनिक स्वच्छतागृहाची ३०३ कामे सुचविण्यात आली आहेत.

अर्थसंकल्पात नागरी सहभाग उपक्रमामध्ये पाच हजार १०२ नागरिकांनी प्रतिसाद देणे हे शहरातील वाढत्या नागरी सहभागाचे प्रतीक आहे. नागरिकांच्या सूचनांमुळे अर्थसंकल्प अधिक प्रतिसादक्षम आणि समावेशक तयार करण्यास मदत होईल. सूचनांचे तांत्रिक परीक्षण करून त्यानंतर मंजूर कामांची अंतिम यादी जाहीर करण्यात येईल. या कामांचा आगामी अर्थसंकल्पात समावेश करण्यात येईल, असे महापालिका आयुक्त शेखर सिंह यांनी सांगितले.