पिंपरी-चिंचवड: पिंपरी -चिंचवड महानगरपालिकेच्या रहाटणी उपअग्निशमन केंद्रामार्फत वाकड परिसरातील एका पंचतारांकित हॉटेलमध्ये मॉक ड्रिलचे आयोजन करण्यात आले होते. यावेळी आपत्कालीन परिस्थिती व अग्निदुर्घटनेच्या प्रसंगी नागरिकांची व हॉटेलमधील कर्मचाऱ्यांची सुरक्षित सुटका कशी करावी याबाबत मार्गदर्शनासह प्रत्यक्ष प्रात्यक्षिक दाखवण्यात आले.
सदर मॉक ड्रिल सहाय्यक आयुक्त (अग्नि) उमेश ढाकणे आणि उपअग्निशमन अधिकारी ऋषिकांत चिपाडे यांच्या आदेशानुसार, प्रभारी उपअग्निशमन अधिकारी विजय घुगे यांच्या मार्गदर्शनाखाली पार पडली. या मॉक ड्रिलमध्ये अग्निशमन विभागातील अधिकारी, स्थायी कर्मचारी, शिकाऊ जवान,सहभागी झाले हिते. तसेच यावेळी हॉटेल व्यवस्थापन प्रतिनिधी व कर्मचारी मोठ्या संख्येने उपस्थित होते.
या मॉक ड्रिलमध्ये आग लागल्यास धुरामुळे होणारा गुदमरण्याचा धोका, लिफ्टचा वापर टाळणे, जिन्यांचा वापर करून बाहेर पडणे, हॉटेल व्यवस्थापनाने अग्निशमन यंत्रणा तत्काळ कार्यान्वित करणे, तसेच अग्निशमन विभागाशी त्वरेने संपर्क साधणे या महत्त्वाच्या मुद्द्यांवर सविस्तर माहिती देण्यात आली. अग्निशमन दलाच्या जवानांनी प्रत्यक्ष प्रात्यक्षिक करून अग्निशामक सिलिंडरचा वापर कसा करावा, धुरातून सुरक्षितपणे बाहेर कसे पडावे, तसेच बचाव कार्य करताना कोणती काळजी घ्यावी हे प्रात्यक्षिकातून दाखवून दिले.
“अग्निदुर्घटनेची वेळ सांगून येत नाही. अशा वेळी योग्य निर्णय आणि तत्पर कृती जीवन वाचवू शकते. म्हणूनच मॉक ड्रिलद्वारे नागरिकांना व संस्थांना प्रत्यक्ष सराव करून सज्ज करणे हे आमचे उद्दिष्ट आहे. पिंपरी -चिंचवडसारख्या वेगाने विकसित होणाऱ्या शहरात उंच इमारती, व्यावसायिक प्रकल्प आणि गर्दीच्या ठिकाणी सुरक्षेची जाणीव असणे अत्यंत गरजेचे आहे. आमच्या विभागाकडून अशा प्रकारच्या सरावाचे आयोजन सातत्याने करण्यात येईल. यामुळे नागरिकांमध्ये सुरक्षिततेची जाणीव वाढेल आणि आपत्तीला सामोरे जाताना घाबरून न जाता योग्य कृती करण्याची सवय लागेल.” – उमेश ढाकणे, सहाय्यक आयुक्त (अग्निशमन दल), पिंपरी- चिंचवड महानगरपालिका
