पिंपरी : पिंपरी-चिंचवड शहर अस्वच्छ व विद्रूप करणाऱ्या सात हजार २१४ व्यक्ती आणि व्यावसायिक आस्थापना चालकांवर महापालिकेच्या आराेग्य विभागाच्या पथकांनी दंडात्मक कारवाईचा बडगा उगारला आहे. वर्षभरात एक काेटी ४८ लाख ८५ हजार ७०० रुपयांचा दंड वसूल केला आहे.
केंद्र सरकारच्या स्वच्छ भारत अभियानात पिंपरी-चिंचवड महापालिका सहभागी झाली आहे. शहर स्वच्छतेबाबत इंदौर पॅटर्न राबविला जात आहे. त्यासाठी कचरा कुंडीमुक्त शहर संकल्पना राबविली आहे. १८ मीटर पुढील रस्त्यांची साफसफाई यंत्राद्वारे केली जात आहेत. घरोघरचा कचरा संकलनाचे काम ठेकेदारांमार्फत सुरू आहे. ओला, सुका, प्लास्टिक, घातक, वैद्यकीय अशा पाच प्रकारे वर्गीकरण केलेला कचराच स्वीकारला जात आहे. कचरा वर्गीकरणाची जनजागृती केली जात आहे.
शहरातील काही नागरिक कचरा रस्त्यावर टाकत असल्याचे दिसत आहे. त्यांच्यावर महापालिकेकडून दंडात्मक कारवाई केली जाते. सार्वजनिक ठिकाणी थुंकणे, लघुशंका व शौच करणे, राडारोडा, कचरा टाकणे, कचरा रस्त्यावर जाळणे, डास उत्पती ठिकाणांकडे दुर्लक्ष करणे, कचऱ्याचे वर्गीकरण न करणे, जाहिरातींची भित्तिपत्रके लावणे, वैद्यकीय कचरा रस्त्यावर टाकणे, बंदी घातलेल्या प्लास्टिकचा वापर करणे यासह विविध प्रकारे शहर विद्रूप करणे अशा वेगवेगळ्या माध्यमातून शहर अस्वच्छ करणाऱ्यांवर महापालिकेकडून दंड वसूल केला जातो. १ एप्रिल २०२४ ते ३१ मार्च २०२५ अखेर शहर विद्रूप करणाऱ्या सात हजार २१४ व्यक्ती आणि व्यावसायिक आस्थापना चालकांवर दंडात्मक कारवाई करण्यात आली. त्यांच्याकडून एक काेटी ४८ लाख ८५ हजार ७०० रुपये दंड वसूल करण्यात आला आहे.
स्वच्छ सर्वेक्षणाचा १७ जुलै रोजी निकाल
शहर स्वच्छता आणि जनजागृतीसाठी महापालिकेच्या आराेग्य विभागाच्या वतीने दरवर्षी कोट्यवधी रूपये खर्च करण्यात येत आहे. केंद्र सरकारच्या स्वच्छ भारत अभियानात शहराने सहभाग घेतला आहे. गतवर्षी स्वच्छ सर्वेक्षणात शहराचा देशात १३ वा आणि राज्यात तिसरा क्रमांक आला हाेता. त्यामुळे यंदा यामध्ये सुधारणा की घसरण हाेणार हे १७ जुलै रोजी जाहीर होणाऱ्या निकालानंतरच स्पष्ट हाेणार आहे.
उघड्यावर कचरा, राडारोडा टाकू नये. लघुशंका करू नये. घरोघरचा कचरा पाच प्रकारात वर्गीकरण करून गोळा केला जात आहे. ओला, सुका, घातक, प्लास्टिक व वैद्यकीय अशाप्रकारे वर्गीकरण करून त्याची विल्हेवाट लावली जात आहे. नागरिकांना स्वच्छतेची सवय लागावी म्हणून शहर विद्रूप करणाऱ्यांवर दंडात्मक कारवाई केली जात आहे. – सचिन पवार, उपायुक्त, आरोग्य विभाग, पिंपरी-चिंचवड महापालिका
